Ariana雙重安檢港騷嚴防恐襲

24歲小天后Ariana的《Dangerous Woman》世界巡唱由今年2月展開，但英國站竟遇上恐怖襲擊，隨即叫停往後幾場演出，當時更傳出取消餘下所有場次包括香港站，幸她最後決定繼續開騷，昨日終於唱到香港！恐襲後首次來港的Ariana於亞洲國際博覽館作大型演出，大會保安比以往多位外國天后來襲時更加嚴密！保安局局長李家超日前表示香港恐襲風險維持中度，但警方於騷前幾日已率先進行反恐演習，明顯重視今次保安工作！

派透明袋 放私人物品

昨日開騷前，場外已有衝鋒車坐鎮，警方派出約40人「反恐特勤隊」出動，與主辦單位及亞博館保安合作，下午更見有大批保安開會。據知，一切可疑人士被禁入場，現場不但有荷槍實彈警員戒備，更見有偵察軍火炸彈的搜索犬不停巡邏！警方還帶備埋輪胎刺破帶，以防可疑車輛攻擊會場。今次警員加上保安人數逾百人，比曾來港開騷的麥當娜（Madonna）與Britney Spears等天后更大陣仗！

會場外圍見不少警察站崗，部分更帶着警犬。	場內有搜索犬巡邏，嚴防有人攜爆炸品。	警察在會場外截查途人，以防萬一。

主辦單位亦為觀眾訂下一系列入場規定以策安全，相機、攝錄儀器、樽裝及罐裝飲品、自拍棍與長遮等統統被禁帶入場，連支持偶像的旗幟與橫額亦不准帶入場，最嚴謹的是觀眾不可帶背包與手提袋入場，僅可帶比A4 Size小的透明膠袋，載電話、銀包與充電器入場！其他行李則可即場寄存。

觀眾排隊入場等安檢，人龍一度打蛇餅。	粉絲需接受搜查隨身物品與雙重金屬探測器檢查，方可入場睇騷。	粉絲攞膠袋放私人物品，先過「第一關」。

粉絲呻麻煩 乖乖排隊

昨午4時，已有約70幾人排隊，大會開始安排觀眾入場。觀眾需先於5號館排隊拎一人一個的透明膠袋，再行入2號場館接受安檢，包括搜查隨身物品與接受雙重金屬探測器檢查，最後再排隊入1號館睇騷！對於要「連過兩關」才能入場睇騷，有粉絲坦言麻煩兼困擾，其中有學生身穿校服趕到場，書包都未放低：「都幾麻煩，唔畀帶書包入去，但都明白嘅！」有外籍粉絲則讚新保安安排：「都算清楚，雖然少少麻煩但都值得。我哋見到好多警察同保安，覺得安全咗。」而大部分粉絲亦乖乖排隊入場。大會原定8時開騷，但8時15分場外仍有大量觀眾未入場，最後Ariana於8時22分先現身開騷，一開場就唱人氣歌《Be Alright》，又大叫「Hong Kong」與粉絲打招呼，炒熱全場氣氛。

另外，Ariana昨早於社交網上載早前的開騷相，大嘆昨晚為巡唱最後一場，感覺悲喜交集。曾與愛女走過恐襲陰霾的Ariana媽媽Joan亦有轉載相片，留言撐囡囡完騷後將會有新開始！

文：外娛組