羅伊婷硬撬Cheronna男友？
歌手吳嘉熙（Super Girls成員Cheronna）兩個月前宣布和「夏雨仔」黃奕晨（Dixon）拍拖後遭撬牆腳？「情敵」羅伊婷（Daisy）趁她離港期間請Dixon食「免費餐」，更施露「點」誘惑，兩人被捉到正時，Daisy超尷尬，Dixon緊張到撥涼降溫，Cheronna即時「警告」男友勿「為食」！
在節目《美選D.n.A》中，以21吋蛇腰撼低36F豪乳鄧月平的冠軍得主羅伊婷（Daisy），日前被本報直擊向夏雨兒子Dixon送外賣，當日Dixon和歌手李拾壹在尖東拍攝ViuTV劇集《未來還未來》時，露出肚臍一「點」的Daisy突然出現，見她兩手抽住大膠袋，跟工作人員Hi完就拿出雪糕派街坊。
放電賣萌笑騎騎
之後Daisy拉埋Dixon一邊坐在石櫈上，再送上「與眾不同」的雞蛋仔和夾餅，兩人旁若無人、邊食邊傾睇手機內的相，Daisy一時輕托香腮、一時賣萌做可愛動作，搞到Dixon笑騎騎。據知當日Daisy沒有場口，她無故現身令人大感出奇。
當兩人發現被攝入鏡頭時，Daisy露出驚訝表情，反而Dixon較鎮定笑笑口揮手，問兩人是否正開工？Dixon即說：「我係。」Daisy再答：「我唔係，不過咁啱喺附近嚟探班。」為何只得Dixon有得食雞蛋仔？Daisy咿咿哦哦：「因為……。」Dixon自爆：「佢頭先message我。」Daisy聞言緊張到抹面又整帽再笑罵：「麻煩友！」Dixon說：「佢知我唔係乜都食。」不擔心女友Cheronna呷醋？Dixon即說凡事都向女友匯報，不過愈講愈緊張的他要用劇本撥涼！
維護男友知道合作
至於現時身在外地的Cheronna被問到男友食Daisy「外賣」，她說：「咁多朋友請佢食嘢，佢會唔會變肥仔o架？佢應該有畀番錢Daisy嘅。」她又維護男友，指他似有提及此事，亦知男友和Daisy正合作拍劇。
文：音樂組