翠如畀李家鼎箍頸 痛到嗌
藝人黃翠如昨日與李家鼎等出席活動時，自爆當年曾遭對方「打」，翠如憶述當時情況：「我嗌痛，佢話：『我都未用力！』」未免太不憐香惜玉！
藝人黃翠如與李家鼎昨日到紅磡出席活動，分享入廚難忘事，李家鼎之子李泳豪亦有到場。翠如向李家鼎偷師廚藝前，先爆當年曾被對方「打」：「記得嗰陣拍《師父．明白了》，佢要箍住我條頸，我嗌痛但佢話：『我都未用力！』（覺得佢好惡？）唔惡！佢仲有好多古仔講畀我哋聽添，嗰陣我都成日喺化妝間聽佢講古仔！」
爆「楠」友嫌棄廚藝
翠如又指男友蕭正楠（Edwin）似嫌棄其廚藝：「我平時都有煮嘢食，魚同蝦都識煮，但Edwin煮得好過我啦！起初我都有煮畀佢食，後來佢叫我唔使煮，但我自問OK，或者佢要求高！（你喺新劇《使徒行者2》同袁偉豪激咀，唔驚Edwin嬲？）我喺劇中有好多感情瓜葛，Edwin點都會睇，咁我都可以睇番佢嗰啲啫！」
李家鼎再談到私房菜負面新聞：「私房菜生意幾好，因為有直播鏡頭影住我做嘢，冇得偷雞。（畀人投訴出糧唔啱數？）唔知啲後生係咪縱壞晒，做三個鐘話唔撈，侍應幫手搬搬抬抬都好常見，但你話唔做都冇問題，之後請人會講清楚。依家請人難，工時長又踢晒腳。（驚影響聲譽？）唔緊要，當宣傳！」
文：影視組