江若琳內衣開騷 攞正牌辣(興)男友
江若琳在演唱會中激罕性感上陣，與男友當眾跳辣身舞！她連番自爆在事業跌落谷底時，為避開追訪監生做「拖篋藏屍」，又慘遭好友背棄，更大爆好友杜汶澤當年願將100萬身家借給她，認真夠義氣！
江若琳（Elanne）前晚終圓夢為個唱揭開序幕，以Deep V露背裝大膽施誘，有男歌迷大叫「Sexy」，Elanne笑說：「識嘢呀，哥哥仔。」嘉賓艾粒以「生煎包」廚師衫登場，抵死指Elanne衣着太性感，令他們不敢望，又爆Oscar在後台望住電視說：「『個衰豬搏到咁盡，幾鬼索。』邊有男友咁講女友？」笑爆全場。Elanne其後換上透視內衣裙與「生煎包王」男友Oscar（蕭潤邦）大跳貼身舞，Elanne公然讓男友又攬又摸，更瞓在男友大髀上舉腳，意態撩人。跳完舞兩人十指緊扣返回後台，sweet到爆。
阿澤借百萬身家
被合約官司纏擾多年的Elanne在台上爆料，指當年因要到律師樓簽文件，為避開傳媒追訪，惟有匿入行李篋，由朋友抬落樓再由貨車司機搬上車，她笑說：「個司機話一生難忘，因我令佢第一次有棄屍感覺，我亦學識能屈能伸，從今可以叫我做篋神。」Elanne又坦言谷底時曾遭朋友背棄：「有個我自以為朋友嘅人，我有事時佢同記者講，同我唔熟，有咩問番我，幸好依家都有真心朋友。」壓軸出場戴住黑超的嘉賓杜汶澤高唱《叉燒包》，但頻頻甩嘴，又將「叉燒包」改唱「生煎包」，阿澤說：「我幫你唱首歌，好過借錢畀你打官司啦。」Elanne即說：「當我打官司時佢話錢冇乜，只有100萬，佢真係好有義氣。」
茶餐廳「飛釘」
阿澤又踢爆Elanne「飛釘」事件：「當日佢喺電影入面着肥婆衫扮大隻，轉景去茶餐廳食嘢，佢除咗肥婆衫着背心，原來連入面（胸圍）都冇戴，最好笑，舖頭見佢大駕光臨搵佢影張相當宣傳，佢不停企响我後面，自此我就叫佢飛釘Ling。」引來觀眾大笑。
文：音樂組