湯佬前妻姬蒂拖實占美霍士含春行沙灘

現年49歲的占美霍士（Jamie Foxx），被狗仔隊影到拖住38歲的姬蒂賀姆絲（Katie Holmes）在馬利布行沙灘！相中二人頭戴情侶帽及架上墨鏡十指緊扣，男方木口木面，姬蒂則嘴角含春，笑容甜到漏！兩口子加埋超過80歲，但仍童心未泯地玩踢水，戀愛果然能令人回春！

離婚翌年傳撻着

占美與姬蒂終於「被公開」戀情理應可喜可賀，但網民似乎唔多關心，有網民留言說：「我對佢哋兩個拍拖嘅消息興趣唔大囉！」亦有人認為占美襯唔起姬蒂：「姬蒂賀姆絲可以搵個比占美霍士更好嘅！」不過亦有網民衷心祝福：「祝佢哋好運，可能今次嚟真，我希望佢哋開開心心。」

其實姬蒂早於2012年6月與影星老公湯告魯斯（Tom Cruise）離婚後，翌年已傳出撻着湯佬舊片《同行殺機》（Collateral）的拍檔占美，二人被目擊在一個慈善晚宴上大跳辣身舞，同年占美首度回應指緋聞可笑之餘，更是百分百不實！

不過到2015年，占美在錄音室拖姬蒂手仔的照片外洩，翌年占美的朋友Claudia Jordan更在網台節目中爆響口，指占美與姬蒂蜜運中！同年3月，姬蒂手上出現神秘戒指而傳出已跟占美訂婚，但當時占美的發言人否認戒指由占美所送。二人今次拍拖有圖有真相，兜兜轉轉傳足N年的戀聞，終於水落石出了！