周柏豪未玩夠唔願做湊仔公
入行十年的周柏豪歌影視三棲發展，多年來獲得「大文豪」、「男神豪」等稱號，但無論名字怎麼轉，他依然故我熱愛運動。柏豪更直言要趁跑得走得、未使「湊仔洗碗」前，好好享受打完波仲可以去打邊爐的日子！
今年是柏豪入行十周年，曾於2014年勇奪男歌手金獎的他，唱而優則演，近年花了不少時間在電影工作上。
入行十年愛演戲
早前與蔡卓妍合演的電影獲得不俗的成績，柏豪坦言喜歡做演員：「我好鍾意拍嘢，因為嗰樣嘢係唱歌畀唔到我，我覺得拍戲嘅劇本同我唱歌嘅歌詞一樣，睇吓用咩方法演繹，拍完戲嘅感覺又可以攞嚟寫歌，兩方面有化學作用。」工作忙碌，運動就是柏豪最佳的減壓良方。對他來說，做運動不是以日計，而是以次數計，算得上是不折不扣的「運動型男」：「如果唔使返工，可以做足七日，甚至唔係以日數計，夜晚分分鐘又可以跑步。」
貪玩入樽整斷手
讀書時期柏豪已經是運動健將，尤其熱愛打籃球，更試過為籃球而受傷：「細個講緊十六、七歲，以前跳得高，個人輕，打籃球又Fit，試過跳上去入樽掹實個框，細個就係咁，淨係諗點做高難度動作，冇諗過做完點落番嚟，結果隻手撳住地下落地，一落地嗰下已經Feel到兩隻手斷咗，兩個手腕即時變成紫色，啲瘀血滲出嚟，微絲血管爆晒，啲筋傷晒！」描述得繪影繪聲的他續說：「雙手直頭震，郁唔到，但唔係即時去照X光，而係去睇跌打。」
風頭躉有人餵食
這一次，柏豪雙手打了石膏三個月，連吃飯也要同學效勞，柏豪展現招牌笑容說：「嗰時喺學校食飯食唔到，隔籬個女同學餵我囉，餵咗兩個幾三個月。」柏豪又否認獲對方主動追求：「細個好『嘟』，冇因為感動而同佢一齊，佢係女班長，如果係男班長餵都冇所謂嘅。」
不過柏豪承認學生時期是「風頭躉」：「都多人留意，因為我打籃球，當時學校所有球類運動、田徑運動都關自己事，籃球隊又多人注目啲，女同學買嘢畀我飲，嘢食方面好多選擇，女同學方面就冇咩選擇，哈哈。」
擔心脫髮兼凸腩
入行後，柏豪更珍惜與朋友一起做運動的時光：「好難夾時間，我同朋友講打得幾年得幾年，趁仲有頭髮，打波就有型啲囉。」想起有句潮語因柏豪而來：「冇周柏豪咁嘅樣，唔好學周柏豪All Back！」想不到柏豪也擔心有脫髮危機：「都係網民搞吓笑，年紀大大吓冇頭髮就戴Headband（頭帶）囉，趁依家肚腩唔係好大，跑得走得，打完波仲可以去打邊爐，而唔係打完波要返去湊仔嘅歲月，要好好享受，有啲朋友打完波要即刻返屋企幫老婆手洗碗呀！」
賢妻體諒仲內疚
柏豪於2016年跟拍拖十年的圈外女友Stephanie結婚，問到這種「湊仔洗碗」的日子是否不遠矣？柏豪卻表示生育一事暫不在計劃內：「呢個未來未知係幾時，睇緣分。」他坦言現時工作上有很多機會，想好好把握，問到太太可有投訴？柏豪笑言：「佢冇投訴，反而我幾想佢投訴我。有時真係覺得成個月返唔到屋企，都會擔心o架嘛，有時屋企都需要我，唔只講另一半，屋企人都需要，有時會擔心佢哋。」他又笑指若太太投訴他，可減輕其內疚感：「情願佢有佢投訴，我有我做，冇人投訴，好似冇人關心我咁。我好似變咗一個角色，冇交流咁，鬧吓我會好啲。」柏豪又甜絲絲補充一句：「其實佢（太太）好關心我嘅。」
後記：長不大的男孩
外形討好的柏豪，是不少少女心目中的男神，但他冇因男神之名驕傲自滿，相反工作態度認真。訪問當天帶病上陣，依然配合鏡頭擺出多個健身動作，絲毫不見倦容。提起往事，他更是眉飛色舞，盡現小男生一面，十足大細路！
文：專案組
攝：劉斌
場地：Fight Hard Fitness