王敏德呻個仔索錢夜蒲

藝人王敏德（Michael）昨日現身直升機活動，被問到兒子王躍穎對駕駛直升機可有興趣？Michael認為他頗有潛質：「希望佢有一日主動同我講想學，呢個係我最大願望，但佢暫時都表現得好Cool。」至於兒子有何嗜好？Michael踢爆對方最近愛上蒲蘭桂坊：「佢有晚10點同我講要出去，仲問我有冇錢。（囝囝有女友未？）我乜都唔知，上星期見佢同個女仔一齊，問係咪女友？佢話佢哋唔講拍拖，係朋友！我再問有冇拖手同Kiss？佢就話Maybe有，搞到我好亂！佢家姐知咩事但唔同我講！（因為你惡？）我唔惡，太太（馬詩慧）最惡。」