跪地冧唱求婚歌 梁漢文玩歡樂卡輸牌娶老婆

歌手梁漢文前晚開騷自爆娶得美人歸經過,憶述2006年的生日派對中豪言「一次過過晒關,我即刻娶你做老婆」,來氹「太太」林文慧玩歡樂卡,最終對方成功過關,他即兌現承諾結婚,並透露歌曲《註定》是求婚歌。

梁漢文(Edmond)一連兩場的《梁漢文我的另一半音樂會》前晚假九展StarHall開鑼,太太林文慧(Karen)一早到場招呼朋友,有好兄弟陳奕迅(Eason)和太太徐濠縈、父親陳裘大及任賢齊夫婦、黃心穎與家姐黃心美捧場,謝霆鋒、容祖兒、楊千嬅及李克勤等則送上花籃。Edmond多次走到台邊與歌迷握手,期間遭扯手及攬腰險跌落台,幸得保安人員及時拉開歌迷的手。

Karen台下甜笑

甚少談情史的Edmond自爆當年求婚經過:「2006年我生日約咗2、30位朋友慶祝,有人提議用啤牌玩歡樂卡,每人抽一張牌鬥大,冇人一次過過晒關。」當時只有「太太」未參與,Edmond即邀對方玩:「仲話如果你一次過過晒關,我即刻娶你。」坐在台下頭行的Karen即甜笑。Edmond更大方透露當年為求婚特別作了歌曲《註定》:「鼓譟聲下佢就玩啦,點知佢過晒關。當年冇張揚講太多,其實《註定》係我嘅求婚歌。」隨即冧爆跪地向老婆唱歌,相當甜蜜。

另外,前晚往捧Edmond場的Eason,之前在內地歌唱節目《中國新歌聲第二季》因學員與周杰倫的學員對決而玩暗寸,周杰倫為學員重新編曲非常有自信,抵死的Eason笑說:「這個沒有人可做到,包括誇讚自己。」

文:音樂組