袁偉豪認愛張寶兒:未過試用期

型男袁偉豪(Ben)昨日到旺角街頭示範咖啡拉花,早前被本報獨家踢爆與港姐張寶兒秘戀的他,似乎早有準備。問二人是否交往中?他即大方承認戀情說:「算係,始終大家都要工作,咁我仲未過Probation(試用期),仲需要時間去磨合。(係咪拍《打工捱世界II》撻着?)你哋覺得係就係啦,喺旅程認識對方,拍完返嚟都有3個月,本身都想穩定啲再講,大家知我比較低調,但始終紙包唔住火。」

岑杏賢變親人

講到兩任女友岑杏賢與張寶兒都是港姐,被封「港姐殺手」的Ben笑言:「只係咁啱有緣,我做『大媽殺手』都得!到咗想穩定嘅年紀,工作圈子都愈來愈細,見得多嘅都係同行,經過我多番考慮,決定坦誠面對。(張寶兒有咩吸引你?)佢份人好甜、心地好、係吸引嘅。(見咗家長?)未,大家都忙,我都要返深圳拍嘢,大家暫時手機聯絡住先。」

講到「前度」岑杏賢祝福他的新戀情,Ben說:「都知道,佢睇到報道第一時間已經聯絡我,好感激佢,依家大家好似親人,係換咗一個方式去愛大家。(都想佢有拖拍?)絕對相信佢會搵到適合佢嘅人,會比我更好條件。」