伍樂怡疊冧杯被咒CupCup可危
森美昨日在活動中玩謝一班候選港姐，不但老點(4)黃瑋琦自認「好鹹濕」，亦口花花叫17歲(6)邱晴做他「新抱仔」，冇厘正經！最後他更趁住(8)伍樂怡疊冧膠杯，口衰衰預言對方會大熱倒灶，事後卻自覺玩得毫不過火！
藝人森美、陸浩明和十位候選佳麗昨日在馬鞍山出席無綫《2017香港小姐競選》之「決鬥一分鐘」活動。擔任司儀的森美在台上瘋狂出招玩謝一班佳麗，先是明知黃瑋琦（Emily）不諳廣東話，卻「老點」Emily指今日天氣熱可以講成天氣「鹹濕」，搞到對方傻更更照讀：「我今日好鹹濕！」之後他再指年紀最輕、僅17歲的邱晴（Mandy）只大自己囝囝幾歲，口花花說對方可以做他新抱仔：「但做佢老爺要好謹慎先得！」最後更趁伍樂怡（Kelly）疊冧膠杯之際，謂此乃大熱倒灶的先兆！
黃瑋琦認「鹹濕」當學嘢
訪問時，被指耍到一班佳麗陀陀擰的森美指自己不會玩得太過火：「適可而止啦，都會保持佢哋形象，『鹹濕』兩個字就畀佢哋講，『鹹濕嘢』就唔會畀佢哋講。」而Emily則指落到台下才知「鹹濕」的意思，問會否覺得森美衰？她反而請大家包涵她廣東話麻麻：「當係學嘢！」
黃凱琪幫手打圓場
至於Kelly就不覺得疊冧杯「唔老利」，幫手執杯的(7)黃凱琪聞言亦幫對方打圓場：「Live嗰度有人都話係落地開花富貴榮華！」又指視對方為老友而非對手：「因為自己先係最大對手，要克服好多心裏難關。」
文：影視組