梁烈唯人肉風火輪中拳「大細超」
今年初榮升人父的梁烈唯，日前到香港仔為邵氏網劇《飛虎極戰》拍攝打戲，同場還有黃子恆。唯唯為角色練出一雙麒麟臂，並與身形大他兩個碼的外籍拳手對打，他被抬起上演「人肉風火輪」，對戲時更意外被「沙煲咁大個拳頭」打中左眼眉骨，頓時紅腫，經過冰敷處理見沒大礙，即面不改容繼續投入拍攝，奶粉錢認真唔易賺！
唯唯受訪時提到受傷，他說：「動作戲係好難免，預咗，我都冇乜大礙，反而負責打人嘅壓力真係好大，自己同人打交都已經係中學時代嘅事，啱啱中拳嗰下，回憶返晒嚟！（有咗小朋友學識錫身？）都係，公司有安排替身畀我，以前都會同武指講想試，但依家唔會，畢竟受咗傷又要大家等我。」
勤操肌怕囡囡唔認得
今次飾演反派的唯唯，笑言個性好勇鬥狠，今次操肌三個月亦是為配合角色：「想睇落惡啲，覺得自己個樣太善良，今次集中操手臂、膊頭同上胸。（再除衫騷肌？）都可以嘅！（有冇嚇親囡囡？）擔心佢唔認得我多啲，所以我喺屋企都紮住條辮，囡囡見到會笑。（賺奶粉錢辛苦？）太太辛苦啲，佢全職湊女，個女都好跟媽咪，畀我抱反而喊，想盡力回報太太，有諗過買嘢畀佢，但佢就話留畀個女做教育基金。」
文：影視組