趙詠瑤被調戲 撩男女混合浸溫泉

藝人皓聖（Match，前名劉秉賓）、羅伊婷、趙詠瑤及李建邦（Suzuki），為ViuTV到新西蘭拍旅遊節目《Out筆豬仔團》，考驗四人窮遊的執生能力及忍耐力！

Daisy率先引爆不滿，她說：「Match又論盡又多爛Gag，我唔想再合作！佢拍嘢漏低條褲，要助導返去攞，搞到遲晒！玩Skydiving又喺手掌寫『帥哥』，我真係唔識畀反應！拍街頭賣藝，扮《街頭霸王》打交，佢真打我，仲踢頭，堅嬲呀！」

Match「遺褲」不仁

Match試圖為「遺褲」不仁等「挑機」行為作掩飾，笑言：「Daisy小妹妹係唔明大人諗乜，層次都唔同！佢話唔識反應，係因為我讚Kimi身材好，佢身材就差啲，佢咪唔識反應囉！我打Chinese Kung Fu嘛，喺外國人心目中好受歡迎！」

Kimi樣甜兼身材出眾，風靡幕前兼幕後，她說：「導演日日問我：『今日着唔着泳衣？』，我睇星星呀，着乜泳衣呀！又畀條好性感嘅圍裙我，叫我入面唔好着嘢，變態o架！我打死都唔睬佢，有次仲話要拍我浸溫泉，但只係佢同我兩個，Suzuki同其他人都要清場，我梗係唔受佢氹，唔浸啦！」

李建邦（左起）、羅伊婷、皓聖及趙詠瑤被電視台「賣豬仔」拍旅遊節目。

窮遊期間，四人鬧出不少笑話，互爆瘀事。

Suzuki有艷遇

Suzuki雖然只得1米50高，但此行變成Kimi避開導演的「護身符」，他說：「基本上每日都同Kimi一齊，後尾唔夠旅費，一齊去酒莊打工，仲有得偷酒飲添！Kimi仲試過幫口，製造機會等我抄日本女遊客牌，不過我事後都冇同日本妹溝通，或者留番下輯《Out筆日本團》至搵佢哋啦！」

文：影視組

攝：唐豁莊