梁漢文笑老婆「隨意」撩交嗌

入行28年的梁漢文（Edmond）今晚起假九展舉行一連兩場《梁漢文我的另一半音樂會》，舉行過四次紅館個唱的他，不認同今次在較細的九展場地開唱是「降呢」：「我冇試過，恨咗好耐搞個同歌迷近距離嘅騷，唱自己鍾意嘅歌，我唔介意收少多於一半嘅歌酬，但製作上係同紅館一樣嘅！（賺少好多？）賺錢仲有好多機會嘅。」Edmond想唱冷門及其他歌手的作品，如多年前由台灣天王周杰倫為他而作、但沒有Plug的歌曲，有指周杰倫唱歌好「(舌累)脷」，他呆一呆說：「佢早期嗰啲冇咁『(舌累)脷』。」

厭惡情侶裝

談及騷名《我的另一半音樂會》，問可會請太太林文慧（Karen）上台？Edmond指太太只會做其背後的女人，擔任服裝設計師，並大讚對方：「唔好以為啲衫係買，全部都係佢親手設計、去畫！雖然有啲設計太女性化，我唔係咁接受，但經佢師傅修改就中性啲。」

梁漢文感激太太做其背後的女人。	梁漢文一直想於九展開騷，現終得償所願。	林文慧被梁漢文大爆冇乜手尾。

他又透露可能跟太太同居太久，常心有靈犀穿情侶裝，雖看似甜蜜，但太太其實很厭惡：「有時做運動着埋同一個顏色，太太會叫我換咗佢。（你次次都換？）唔係喎，咁我着先，點解要我換？係佢怕之嘛！」

爆料怕家變

問到兩人可有吵過架？Edmond笑言婚前較多，但全為雞毛蒜皮之事，又自認是極愛整齊的人：「我唔可以容忍啲嘢亂咁擺，好似啲醬油用完要擺番喺原位，啲衫要分類同摺好囉！但太太就……隨意啲，咁我幫佢執囉！（會邊執邊黑面同哦佢？）都會o架，我有我嘅堅持囉！」不過，為免爆料後會「家變」，他隨即補鑊說：「佢依家整齊咗！」還發表愛的宣言，自爆和太太結婚多年最想跟她說：「感激佢對我好細心。」

文：音樂組

髮型：moe@fifth

化妝：Hetty Ma

服裝：Brooks Brothers

場地：The Luxe Manor帝樂文娜公館