定欣扮狗乸累展鵬被咬褲穿窿

由陳展鵬、胡定欣、陳山聰及姚子羚主演、文偉鴻監製的無綫劇《同盟》播出以來口碑不俗,首周24小時跨平台總收視26.2點,上星期四高達27.4點!昨晚劇集再有話題性劇情,「搗蛋拍檔」定欣及展鵬偷入廢鐵場時撞正內有惡犬,定欣犧牲形象扮狗乸冧狗公,但最後搞唔掂,展鵬更被咬到褲襠穿窿,要搵手遮住重要部位,超級搞笑!

定欣受訪時說:「成個角色都好好玩,我係要豁出去咁演,個角色行為好瘋狂,依家睇番都覺得好過癮!其實由上次《城寨英雄》開始咩都豁晒出去,做到都會做,有效果係緊要啲。」至於子羚及山聰晒功夫各自以一敵眾,山聰在停車場一打六,子羚在車廂中一打四,山聰直言拍得辛苦:「我打到濕晒,成件西裝縮晒水!子羚仲陰功豬,打完之後兩隻手似被人家暴完,瘀晒呀!」此外,《超時空男臣》收視26.5點,上星期三更高達27.6點。