同陳豪攬住滾勁HeHe 爆肌森美被女禁足家長會：驚我喺老師面前除衫
藝人陳豪的43吋胸肌成為城中熱話，其新劇拍檔森美不讓他專美，趁自己最後一場戲「脫掉」展示同樣Fit爆的身形。兩個有家室的「Hot Baby」打擂台滾到落地，HeHe味濃，森美還搞笑自爆：「我個女驚我喺佢老師面前除衫呀！」
無綫重頭劇《誇世代》拍攝進入尾聲，男演員陸續除衫騷Quali，前日陳豪與森美更「正面交鋒」，齊齊赤裸上身打擂台。導演一聲令下，陳豪與森美即時「開戰」，二人愈行愈近「相擁」倒地，陳豪更身壓森美「講數」，兩個有家室的人忽然有「肌膚之親」，認真激情！
「太太依家會錫我」
比陳豪早一步抵達拍攝現場的森美，搽BB油又做掌上壓谷胸，目測胸肌亦達43吋，他自豪說：「Fit咗喺屋企好鍾意除衫，去買衫又會喺試身室自拍。（太太好開心？）結咗婚咁多年又生咗兩個，平日冇乜傾偈喇，依家佢會錫我囉，反應最大係囡囡，放暑假前家長日佢唔畀我出席，話驚我喺老師面前除衫！親子活動去遊船河又只要媽咪陪，驚死我畀人睇蝕咁。」事後他將「成果」上載到社交網公諸同好，又叫陳豪做「HeHe情人」，十分搞笑！
「淨係想飲水飲餐飽」
談到森美「挑機」，陳豪笑說：「佢天生麗質，比較輕鬆就換到成果，我日日做Gym又狂戒飲食先得。（拍完呢場戲放自己一日假？）冇諗咁多，淨係想飲水飲餐飽，之前健身連水都唔可以亂飲，又真係唔知點解捱得過去！」
對於有報道指他花500萬為大仔讀書鋪路，陳豪坦言：「做父母嘅梗係想畀仔女最好嘅嘢，盡量做啦，不過我唔覺得金錢同讀書係掛鈎嘅。」又表示3個仔女旅行返港後「好嗲」：「我一次最多只可抱兩個，惟有輪流。嚟緊拍完《誇》劇，我會多啲時間陪佢哋。」
文：影視組