Sophie長腿紅唇煞食真人版芭比

現年21歲的英國女星Sophie Turner因參演神劇《權力遊戲》而彈出,憑着天賦靚樣、高挑身材及招牌長腿,迅速被熱捧上女神寶座!

憑《權力遊戲》(Game of Thrones)上位的Sophie雖然年僅21歲,但望落外形比實際年齡更要成熟,舉手投足都女人味十足,散發仙氣。

身高5呎9吋的Sophie自知天賦的白滑長腿夠吸睛,不時出席活動都識得晒本錢,好似現身頒獎禮時,曾穿上貼身剪裁的銀黑色晚裝,長裙超高衩設計讓粉絲飽覽美腿,加上心口中門大開,上下都睇頭十足,輕易成為焦點。將長髮染金的Sophie穿起鮮紅吊帶高衩裙,更凸顯白皙肌膚,襯埋紅唇簡直艷光四射,十足真人芭比娃娃一樣!

除了高衩晚裝,短裙亦是Sophie的心水,出席時裝騷時,上身雖然包到實,但下身襯上短裙,綴以短或長靴,令視覺上更加顯高挑,長腿無限延伸,Show off其模特兒身形!

識着衫晒長處

不過,Sophie都唔係齋晒腿咁簡單,擁有34、24、34勻稱身材的她不時挑戰超少布的性感造型,曾以Deep V橫間晚裝出席威尼斯電影節,動作大少少都可能走光,背後還騷埋超雪白玉背,令人眼前一亮。Sophie亦曾挑戰過蝦人着的Cut Out裙,腰間Cut Out設計成功展示S形腰線,完全無贅肉Fit爆!Sophie夠靚又識得展露身材長處之餘,又能照顧唔同粉絲需要,女神果然當之無愧!

自嘲活在魚缸 戀情任(目及)

Sophie憑神劇上位,吸納萬千男粉絲,可惜女神一早名花有主!Sophie去年底被爆跟「昔日男神」、歌手Joe Jonas撻着,雖然一開始戀情不被粉絲看好,但二人成功靠玩低調維繫感情,用行動證明情比金堅。不過,Sophie都曾在訪問中呻過同「圈中人」Joe拍拖都好大挑戰:「你感覺就好似生活在魚缸入面一樣,令人感到好失落,愈瑣碎的事愈能成為新聞,真係好悶!」粉絲更為二人取名為「Jophie」。

文:外娛組