箍牙四眼龜累事！糖妹初戀撻Q

自小住在深水埗的歌手糖妹（黃山怡），中學位於附近的石硤尾，早前她重返中學時期經常Hea的必到之處回味一番。就讀區內女子中學的她放Lunch最愛與成班同學去附近的南山邨食飯，由學校去該邨有一條必經之路，重遊舊地的她感到風景依舊、人面全非，但不覺唏噓，只覺原來自己已長大。對糖妹而言，該段路充滿各種難忘回憶，笑言當年若在路上見到前面有一班人，她一定會加快腳步霸位食飯！她又表示有一次參加歌唱比賽首次贏得冠軍後，發現多了師姐認得她：「嗰年行喺條街度，唔再覺得自己平平無奇，原來都有樣嘢叻！」

天秤女孩 重色輕友

中學生當然恨拍拖，糖妹亦不例外，更分享中二、中三情竇初開、但慘食檸檬的往事：「我以前暗戀喺自修室認識、讀隔籬學校嘅男仔，每次行到呢條路就會不自覺執靚自己，如果見到對方唔喺度，就會回復番瘋癲狀態。（有冇下文？）冇啦！表白失敗，我已經好努力。其實嗰時我係超級樣衰，又箍牙又四眼，個樣係『豬扒』到唔可以再『豬扒』，所以失敗好正常，但唔知點解我咁夠薑表白。」她坦言為此失落了一段時間：「因為係隔籬學校，如果見到有人影似佢個心都會揪一揪，但只係維持咗好短時間。嗰陣聽到身邊個個同學開始拍拖，自己冇拖拍好心急，依家睇番其實係太早，根本連愛都唔知係咩！」

糖妹咁可愛，大人細路一樣Like！	放大圖片	糖妹讀書時最愛去文具店尋寶。

雖然上一次表白失敗，但她中學即將畢業時終於有拖拍：「喺出面識咗個男仔，嗰期同中學同學好似少咗聯絡，因為好專注拍拖。（一拍拖就唔理朋友？）有少少(口架)！我天秤座，仲要第一次拍拖，仲唔咩都就晒男朋友？雖然依家睇番覺得花時間拍拖，而冇花喺讀書度係差少少，但我會考成績都唔係好差。」

睇見都流口水！	糖妹夾起箸麵狂笑，未食先興奮！	糖妹行咗兩步，又眼甘甘望實蛋糕。

「彩虹橋」拋接零食

在南山邨除了食Lunch外，糖妹最愛放學後與同學到邨內的「彩虹橋」傾偈，但多年後再遊此地，她竟一度不認得路！她憶述當年有同學住在邨內：「佢哋好鍾意喺上面掟零食落嚟要我哋接住，同埋嗰陣電話啱啱開始有影相功能，我哋影埋好多奇怪嘅相，睇番真係覺得以前好青葱！」她其後又去文具店，笑言小時候最愛在這裏買文具、貼紙、玩具及紀念冊，又去當年經常幫襯的伯伯零食店。

美食總匯返歸冇咁易！

在南山邨Hea夠後，當然夠鐘返歸，糖妹在石硤尾往深水埗的回家之路上，遇上多重誘惑，其中最難抵受的就是食！路途滿是美食景點，糖妹最愛食麵包店的紙包蛋糕，見到店內的雜果蛋糕，令她想起有一年夾錢買蛋糕慶祝同學生日：「以前喺學校慶祝生日，有蛋糕係好光榮同無比開心嘅事，依家好懷念最原始味道嘅忌廉蛋糕。」她之後又經過煎釀三寶小食店及麵店，幫襯老字號麵店時，為食的她食指大動，並說：「呢間我成日幫襯，墨丸同豉油王撈麵係必食，呢度有電影嚟過取景，我每次都會介紹畀台灣或者新加坡朋友嚟食！我依家有Keep住跑步，有時完咗行返屋企唔小心經過呢度，都會食番少少墨丸補充體力！」

儲閃卡回憶返晒嚟！

除了愛食，小時候的糖妹亦喜歡追星，回家路上的小商場有一間專賣明星商品的店舖，她見到當年儲過的明星閃卡即雙眼發光，笑言當年儲了不少閃卡，但現已全數丟棄：「因為覺得長大啦，但依家見到都係好懷念。（有冇儲番自己嘅閃卡？）通常一出新卡或者有特別版，Fans就會買嚟送畀我。」去到報紙檔時，糖妹又憶述小時候至少在這裏花了數千元，身為陳慧琳及楊千嬅粉絲的她，每當見到偶像登上雜誌封面，都一定會買來收藏。不過，她後來把千嬅的雜誌轉贈另一位死忠粉絲，對方見到絕版雜誌時即開心得眼濕濕！

糖妹小時候曾迷戀偶像，現時則已成為其他人的偶像，採訪當日見她被不少街坊認出，大人、細路都爭住向她集郵，她坦言：「我諗啲街坊唔認得我，點估到以前校服裙長過膝頭嘅係糖妹？佢哋係識得依家嘅糖妹，但我知道自己嘅好處係感覺好親切，所以好多時街坊同我打招呼，我都係好似朋友咁Say Hi，覺得呢種生活方式好舒服，深水埗係一個好有人情味嘅舊區！」

文：音樂組

攝：司徒國榮