彭于晏：我幫他全身充血！

余文樂與彭于晏（Eddie）昨晚與導演郭子健，在旺角宣傳英皇電影《悟空傳》。Eddie以半鹹淡廣東話說：「我係奇天大聖（齊天大聖）孫悟空，有我同『好基友』（好朋友）一齊拍！」講到樂仔以11個月苦練爆肌拍攝，Eddie自稱是業餘教練，現場有幫樂仔熱身：「我有幫他肌肉充血，全身充血，等他有好狀態！」樂仔即O晒嘴說：「你講咩充血呀？你返入去啦！」兩男與Fans近距離玩遊戲，樂仔搞笑指勝出者可與Eddie過夜，嚇得Eddie作狀飲墨水，其後他捉住Fans手仔教擺甫士，樂仔即笑他：「平時佢都係咁溝女o架！」

笑Eddie冇女溝

其後兩位主角及導演齊齊受訪，問樂仔是否爆Eddie很叻溝女？樂仔澄清：「講笑咋！佢都冇女溝，係可憐蟲！我有嘅話都會介紹畀佢，但自己都係僅僅夠使咋！」之後他補鑊讚對方是超級筍盤，Eddie亦自認現時單身，問有何擇偶要求？他說：「沒有，談得來就可以。（揀香港女仔？）一直都沒有地域要求，但不是說交就交。」問樂仔一身肌肉，台灣女友王棠云是否嗒晒糖？他說：「佢識我嗰時已經冇之前咁巔峰。（畀佢吸乾晒？）吓？玩呢啲？」

郭子健（中）指拍不拍到續集就要看身邊兩位主角有冇期。

余文樂在戲中飾演爆肌二郎神。

內地票房破七億

提到電影內地票房已破七億元人民幣，樂仔笑言已過目標，郭子健亦感開心：「老闆有錢賺，我又有得玩。（開續集？）睇兩位大哥畀唔畀到期。」對於有觀眾指戲中花果山消失是隱喻香港，樂仔說：「各有自己想法，每個人接收唔同，大家睇到乜就乜。」郭子健亦指觀眾的解讀相當有趣。

文：影視組