錢小豪乜都要早龐景峰：好大壓力

藝人錢小豪與兒子龐景峰、黃澤鋒及可嵐等昨日在紅磡出席拳賽記者會，錢小豪在內地投資拍攝的網絡電影上映數天已有1千萬點擊，香港亦已登上大銀幕。片中父子兵上陣，龐景峰笑說：「爹哋有個好習慣，就係每次拍戲都提早兩個鐘到場地，但令我好大壓力，好似有次call time係8點，爹哋5點已經嚟敲我房門。」錢小豪解釋早起有因：「呢啲係經驗之談，內地外景路程遙遠，啲廁所仲恐怖過殭屍片，遲到就唔好。早啲起身準備飲啖茶、去廁所，最緊要係熟讀劇本。」他又指父子合作愉快，沒有拗撬，自己雖然是父親也是老闆，但不能干預製作，現場交給導演處理，加上自己開工一向抱輕鬆心態，至於可會再合作，錢小豪表示都要導演點頭，不會利用私人關係。