《BigBoys歷險記》腰斬 朱智賢呻可惜

改播「求生」版本

無綫助理總經理（非戲劇製作）余詠珊昨日受訪，承認昨晚播出第二集後將節目腰斬：「因為緊接劇集播，唔可以突然做得太多神怪嘢，諗緊其他嘢放入去（原本的節目時段），總有好啲嘅安排。」昨晚內容已改由陳國峰等跟國際探險專家到郊區體驗原始生活，學習求生技能。余詠珊承認節目與原本構思的內容有出入：「我哋本來諗住係歷險，唔係神怪，唔適合喺翡翠台。」節目監製謝英偉則指會跟隨公司方向。

節目主持之一朱智賢坦言感到可惜：「各個主持都有花心機同精神拍呢個節目，同埋我有啲朋友都好期待睇龍哥，知道冇咗佢都話失望。」另一主持林盛斌（Bob）表示尊重公司決定，望節目將來可在其他時段或平台播出。

拉隊結紮送畀老婆

此外，Bob昨日帶同三女機機出席活動，臨盆在即的太太亦撐場，Bob嫂早前在社交網透露患上妊娠糖尿，要每日捱針穩定血糖，Bob說：「其實之前都有，但今次嚴重啲，要每日打四支針，我都話唔一定要BB，但佢好勇敢。」並指太太將於八月底順產生B，問有否想過結紮？他笑說：「諗過約埋幾個男藝人一齊去，有啲二人同行有折嘛！（叫埋陳豪？）可能佢想生落去呢！結紮當送份禮物畀太太，無後顧之憂！」

文：影視組