龔嘉欣為新劇學游水

藝人龔嘉欣昨午到柴灣出席活動，與粉絲大玩遊戲。席間她自爆愛到屋企天台享受日光浴：「我住村屋，方便嘛，放沙灘椅再加杯咖啡咁。本來諗過網購吹氣泳池，但驚負荷唔到。（努力搵錢買大屋兼有泳池？）呢個係我目標之一。」談到即將拍畢《誇世代》，嘉欣透露下月將夥拍張振朗開拍新劇：「我唔識游水，但有場戲要落海，所以已經開始做緊準備工夫，請教練教。（唔搵《誇》劇拍檔余德丞教？）唔好喇，我搵咗個女教練，如果搵男嘅要單身同靚仔先得。佢（余德丞）游水叻啫，唔知識唔識教人。（今次升呢做女一？）留番公司公布。」