成龍直斥美國演員唔專業

「香港演藝人協會籌款晚宴2017」昨晚假尖沙咀舉行，曾志偉、任達華、余安安、王君馨、黃心穎、鄧月平、鄺美雲、米雪及陳家樂等赴會，場面熱鬧。今年主題為「Warm and peace」，現場擺放了不少藝人的「親熱照」，包括曾志偉咀爆成龍、成龍咀古巨基及楊紫瓊等友愛照片，認真「sweet爆」。

演藝人協會會長成龍因身在外地為新片開工而未能出席晚宴，但志偉和安安稱會向他頒贈「演藝貢獻榮譽大獎」，故特別透過FaceTime平台直播於現場互動，期間成龍解釋不能回來的原因，是為解決他的電影問題：「因為啲美國演員唔專業，有好多無理要求，搞到我要叫晒班製片嚟晒開會解決問題！我趕唔到返嚟！」

余安安捐畫作拍賣

是晚大會筵開46席，並拍賣藝人捐出的珍藏為協會籌款，包括陳慧琳捐出戴過之頭飾，底價3萬；成龍捐出兩箱珍藏紅酒共12支，供無底價競投，另外還有馬來西亞價值116萬港元的樓盤，以底價50萬拍賣。而鍾鎮濤簽名結他底價10萬，最終以20萬成交。

鄧月平	王君馨高衩晒靚腿。	鍾舒漫性感養眼。

身為該會名譽會長的曾志偉笑說：「呢排多傳染病，希望今晚可以將愛好似傳染病咁傳畀大家啦！今晚主要係籌募經費，水源短缺呀！（目標籌幾多？）目標好大，籌唔到咁解啫，所以大家隨緣樂助，好多謝『籌錢主席』肥媽，佢一開聲好多人幫手。」而籌委會主席余安安說：「希望大家多啲愛，籌款畀個會去幫人，同時個會都需要人幫。（你送出畫作『富貴有余』拍賣？）我用咗兩日時間去畫，出咗綿力，希望籌到錢。」

朱慧敏吻賀新婚的王君馨。

余安安捐出畫作拍賣，曾志偉梗係畀Like。

黃心穎結婚會交代

由於大會Dress Code是「北非諜影40年代打扮」，不少女星作懷舊性感亮相吸睛，人妻王君馨以高衩裙晒腿登場，鄧月平則穿Tube Dress晒線，蜜運中的黃心穎露背再加低胸裝晒3吋事業線，鍾舒漫一身黑色打扮中門大開，成功搶鏡。問性感打扮的黃心穎有否先給緋聞男友馬國明過目？她說：「未喎，報道出咗佢咪睇到囉！（影到你同佢睇戲？）當時我被嚇親。（睇乜片？睇恐怖片驚就可以攬？）唔會，可能我仲大膽。（幾時正式宣布拍拖？）冇需要交代，要交代可能係結婚嗰陣。」而晚會由鄭欣宜、王君馨、鍾舒漫及王梓軒上台獻唱揭開序幕。

文：影視組