一身牛脾氣劉敬雯釋放女人味
歌手劉敬雯（Lydia）的衣帽間有近十件牛仔褸、廿條牛仔褲和卅頂帽，連她自己都直呼變態：「唔知咁多做乜？真係要晒冷！簡直係牛脾氣！」跳舞出身的Lydia形容街舞已像入了血，因此覺得黑、白色和牛仔衫最有型，又方便跳跳紮：「如果你見到我着其他顏色，我應該係心情好到不得了，竟然有閒情襯色。」
Lydia坦言以往沒太多機會扮靚，在男朋友面前亦多數作休閒打扮，曾被朋友與男朋友取笑：「有時我着靚啲，大家都會好驚喜咁話：『你終於唔係着牛仔褲喇！』」
Lydia指牛仔褲最能代表自己，又適合其男仔頭性格，不過現在開始成熟，明白到跳舞和音樂不應被衣着局限：「以前唔夠膽女人啲，好唔慣。依家人大咗，夠膽開拓呢一面，我都好鍾意着裙同高踭鞋，要着多啲唔同類型嘅衫。」
