蕭正楠色膽包天 阿田霸氣還拖

蕭正楠、田蕊妮、曹永廉、王君馨、朱晨麗、陳偉琪等昨日齊為無綫新劇《超時空男臣》宣傳，眾人大玩角色扮演，阿蕭先上演一場英雄救美，救助被男臣們調戲的阿田，抵死的阿蕭要求阿田獻吻以表謝意，轉數快的阿田不甘示弱，揚言要先致電其女友黃翠如，即令阿蕭招架不住「投降」。朱晨麗介紹角色時，表示羨慕同劇的楊詩敏在劇中被幾位男臣獻吻，阿廉見狀即口花花：「其實我哋都可以即場錫你o架！」認真抵死！

唱雙簧駁嘴互片

對於近日喪傳阿蕭的女裝造型照給翠如，阿廉笑言想翠如對男友加深了解：「若果安然度過，證明佢哋感情深厚，真愛勝過一切，我仲有幾張核突相，其中一、兩張係終極啲，幾變態，絕對會影響阿蕭前途，見佢依家上緊（位），唔希望打沉佢住。（露三點o架？）唔露點，但不堪入目，所以等到佢有機會威脅到我，就要佢一鋪清袋！」問到阿蕭可會反擊？他說：「佢咁樣仲恰佢？都人生低點，咪扶吓佢囉！」阿廉即駁嘴：「我覺得我依家係高峰喎！」

蕭正楠、曹永廉一對活寶，成日放笑彈。

陳偉琪今次包到冚唔露，只騷美腿。

曹永廉先撩者賤

阿田對於被劇中三位男臣的搞笑戲份搶鏡，她說：「我就認真做，但拍嗰時阿廉成日引我哋笑，講完佢自己又忍唔住笑，終於喺佢身上明白咩係先撩者賤，佢笑點真係好低！（影響你NG？）係囉！我真係好驚，因為我嘅對白係三、四頁紙咁長，佢哋只係中間插一、兩句，我講緊對白佢哋又忍唔住笑，騷擾我，好在我經驗豐富鎮得住啫！」她又透露老公杜汶澤醉心廚藝，笑言大可在家設訂餐熱線賺番筆。

文：影視組