楊文蔚快閃吸金 歐鎧淳游入書展
繼香港女飛魚歐鎧淳後，體壇又有另一位矚目新星——跳高女神楊文蔚同樣以運動員身份踩過界半隻腳踏入娛樂圈。昨日兩大體壇女神首度同場現身活動，惺惺相惜互笠高帽。
歐鎧淳、楊文蔚聯同有「林丹殺手」之稱的羽毛球運動員伍家朗，昨日出席商場活動，獲贈肖像figure，無綫藝員朱智賢則擔任大會司儀。
歐鎧淳今年殺入書展推出新書，她表示已向教練請假一天到書展捧自己場：「當日有分享會，我亦會喺攤位簽名。（對銷量有冇信心？）唔敢話有，雖然書商話反應唔錯，但一日未賣都唔知。（有冇叫朋友支持？）個個都叫我送，冇人話買。」又表示暫時沒打算再出新作。她大讚同場的楊文蔚：「佢好鍾意笑，好開心，好活潑，大家見到佢會畀佢溶化，見到佢跳高真係覺得佢好犀利，希望有多啲不同界別嘅運動員畀大家認識。」
至於楊文蔚除了跳高，也有做兼職模特兒，問她會否有興趣拍戲？她說：「最重要係時間遷就到，但拍戲需要好長時間，我暫時未有咁多時間，接嘅工作都係要好快完成，拍廣告都只可以用好短時間，因為唔可以阻住我訓練同休息，但拍戲要好多時間，所以唔會喇！（咁有冇人搵過你拍戲？）之前有casting，但冇再傾落去。」
等退役再出書
對於與歐鎧淳同被視為女神，楊文蔚謙稱：「佢當然係女神，但我就唔覺得自己係。（你會唔會倣效佢出書？）暫時冇呢個計劃，想儲多啲經歷先。我覺得出書係退役後嘅一個總結，我依家啱啱做全職運動員，有好多經驗要累積。」
文：名人組