吳若希抱15磅睡寶寶：係西人體重

歌手吳若希（Jinny）昨日跟男友Alex及女兒淼淼一家三口被本報捕獲，本報接獲讀者報料，下午時分於澳門碼頭見到吳若希抱女登船返港，記者趕到上環港澳碼頭，見Jinny登上一架藍色私家車，直駛中環都爹利街一幢商業大廈，該處兒科醫生診所林立。Jinny抱住B女落車，原來Alex也在車內，同行還有陪月姐姐，素顏的Jinny戴住眼鏡，與Alex穿上藍白色情侶裝，雖然她大方企定讓記者影相，但就緊張地用手遮住熟睡中的淼淼，隨後急步入大廈。

面珠肥嘟嘟

在診所逗留了一個小時，Jinny跟Alex落樓，全程不假手於人的Jinny一直抱住B女，由於友人的座駕未到，一家三口企在大廈門口等候，B女繼續在Jinny懷抱中安睡。產後已收身的Jinny透露返港主要帶囡囡做定期檢查，見淼淼面珠仔肥嘟嘟，分量十足，Jinny笑說：「醫生話佢好健康。（佢幾磅？）15磅。（醫生有冇話佢超磅？）冇，話佢係西人體重。」

港澳兩邊走

Jinny上星期已復工，但暫時還是要澳門、香港兩邊走。問到將來囡囡長大後，會否搬返香港居住？她即笑住望着男友Alex說：「睇佢點喇，等佢決定。」記者讚Alex是好爸爸，專程陪兩母女返港睇醫生，Alex笑說：「係呀，連工都唔返。」他手上拿着愛女的診症檢查收據，見到價錢超過四千元，Jinny表示睇完醫生後便返澳門，之後登車離開，Alex細心幫Jinny開車門，安頓眾人上車後才登車，臨別他們還禮貌地向記者揮手道別。

文：音樂組