蔣怡搞爬蟲派對玩曱甴
名模蔣怡與老公翁狄森嚮往大自然，早前精心炮製動物派對慶祝女兒翁容4歲生日，派對上刺蝟、牛蛙、蜥蜴、蜘蛛和蛇亂爬，蔣怡更貪玩把玩用作餵飼蜥蜴的曱甴，嚇到在場的家長尖叫。
蔣怡（Coco）與珠寶設計師老公翁狄森均熱愛動物，2013年於南非在狒狒見證下完婚，結束愛情長跑，女兒翁容亦受父母感染，自小與動物為伴。早前翁容4歲生日，蔣怡特別構思動物生日派對，請來爬蟲專家，帶來多種動物包括刺蝟、牛蛙、蜥蜴、蜘蛛及4條蛇，蔣怡將蛇和蜘蛛放滿身，表現興奮，現場還有蜥蜴吃曱甴的表演。
家長尖叫
蔣怡將曱甴放在手上把玩兼玩直播公諸同好，她說：「好多家長見到都尖叫，啲小朋友初時驚但好興奮，慢慢就夠膽走過嚟仲想摸啲動物，囡囡唔驚，佢好鍾意刺蝟同蜥蜴。（你夠膽玩曱甴？）其實我都驚曱甴，但呢啲曱甴係爬蟲專家飼養，只食士多啤梨同紅蘿蔔，知道食齋就唔驚囉，個樣好乾淨。」
她又透露8月會帶囡囡到加拿大露營，年底則計劃帶女兒到非洲，故是次生日會正好為出埠作綵排。問她會否飼養特別寵物？她說：「唔會養，但欣賞動物，同埋好欣賞呢位爬蟲專家，佢帶啲動物畀小朋友見，唔係為賺錢，係想教育下一代保育嘅重要性，覺得同佢好啱Key。」
文：名人組