石詠莉反覆40℃高燒我好驚！
藝人石詠莉數日前突然反覆發高燒，有時更高達40度，還出現發冷、發熱等病徵，令未婚夫鄧健泓擔心不已，先後為她轉換三間醫院，且連日來衣不解帶於病床旁照顧。身心疲累的他坦言自己情緒出現波動，且推掉不少工作，幸而石詠莉檢查後確診與「奪命流感」無關，總算不幸中之大幸。
正在留醫的石詠莉（Sukie）由本月11日下午開始感到身體不適，凌晨時更高燒至40度，未婚夫鄧健泓（Patrick）隨即安排她到港島區一間醫院睇急症。Sukie接受注射後情況略有改善但需留醫，但醫院床位短缺，Patrick惟有打電話「撲床位」，最終成功安排未婚妻到另一間醫院。留院期間，Sukie病情相當反覆，Patrick說：「佢斷斷續續高燒，可能精神一個、半個鐘又燒過，仲去到39、40度，又會出現發冷、發熱徵狀。昨（前）午佢曾經精靈番少少，仲話要食薯條，以為應該穩定喇，點知今（昨）日又再嚟過！我哋睇開嘅醫生冇喺嗰間醫院掛牌，所以決定幫佢轉院。」
鄧健泓推Job日夜守護
Sukie目前已轉到九龍區一間私家醫院繼續治療，病因有待化驗報告確實，但早前曾從鼻腔抽取組織化驗，得知與「奪命流感」無關。由於要照顧未婚妻，Patrick不單要推Job，還嚴重缺乏休息，令他心力交瘁：「如果佢冇事嘅話，我點辛苦都冇問題！我依家要醫院、屋企兩邊走，抽時間返屋企照顧啲狗狗，但怕唔夠精神揸車會出意外，呢幾日改為的士代步。」昨晚約9時，Patrick搭的士到醫院探女友，頭戴Cap帽兼手提兩大袋物品的他相當憔悴，問到Sukie病況如何？他說：「都好好，多謝大家關心。」語畢即急步上樓。
留醫中的Sukie昨日亦有接受電話訪問，她透露要留醫多一星期：「睇開嘅醫生話我有病毒入咗身體，但未知係乜病毒，今（昨）日仲氣管炎發作。今次咁反覆，我自己都好驚，試過有朋友因為咁而離開……醫生叫我再留院一星期，啱啱抽咗六支血去化驗，依家身體好虛弱、食唔到嘢。」Sukie又坦言看見Patrick每日四處頻撲，夜半仍幫她換冰袋及抹汗，令她感動又心痛。
文：影視組