美國模特兒多籮籮，要走紅絕非易事！最近就有一名擁中國血統的模特兒在美國冒起，她的名字是Jocelyn Chew！自言怕悶的她，不能在同一地方停留太耐，故不時周圍飛，十足遊牧民族。
姓周的Jocelyn現年25歲，身高1米72，擁32、23、33魔鬼身材。身為中國及冰島混血兒的她，在加拿大卑斯省維多利亞一個農場長大，住過加拿大、新加坡、香港及希臘等地，長大後移居美國追尋模特兒夢，現居於紐約。16歲便入行的她，因有一份自己鍾愛的工作而感幸運及感恩，除走勻全世界大開眼界外，她亦從中學習了不少時裝及美容知識，更開設生活網 Jet Set Joce「開心Share」，與Fans分享扮靚心得。
Jocelyn於4年前參加美國模特兒真人騷比賽節目《The Face》首季而走紅，最後更進身12強，當時她的導師是英國「黑珍珠」超模娜奧美金寶（Naomi Campbell）。比賽令Jocelyn知名度大增，迅即成為各大服裝品牌搶手貨，亦曾為時尚雜誌做模特兒。
身為扮靚專家的Jocelyn，認為怎樣才是性感呢？她說：「我覺得冇化妝同喺沙灘上着住比堅尼就最性感！」雖然因工作關係而周遊列國，但她從未去過非洲及冰島，希望有機會一遊：「我有個問題，就係唔可以喺同一個地方好耐，我好快就會悶！所以如果得閒，我會同朋友及家人出外旅行。對我嚟講，人生係製造回憶，同盡量去經歷多啲新事物、文化同構想。」如果當初沒有入行，她又會從事甚麼工作呢？她說：「我會做獸醫或成為一個海洋生物學家。」
姓名：Jocelyn Chew
出生日期：1992年5月15日
身高：1米72
體重：55kg
三圍：32、23、33