囝囝「炫富」被批評 黎耀祥叫好 等佢睇吓人哋意見
藝人黎耀祥、夏文汐、林夏薇及陳家樂等，昨日到電視城出席無綫新劇《逆緣》拜神儀式，提到兒子黎正橋早前在網上展示價值310萬的紅色McLaren 570S超跑，因而被指炫富，祥仔說：「阿仔貪新鮮啫！手錶係老婆嘅生日禮物，佢攞嚟戴，識貨！（車呢？）佢唔係想炫耀嘅，呢件事都好，等佢知道要睇吓人哋意見。（佢同師妹『嫩版湯洛雯』Christy拍拖？）係啩！我未見過。」
夏文汐要求加浪漫戲
同場的夏文汐笑言想監製加戲，她說：「想監製王心慰整番場我同祥仔嘅浪漫戲。」續指今次會留港三個月：「上海啲嘢唔理，我本身有製作公司，交晒畀助手。（損失幾多？）其實係我想轉型幕後，叫人做，唔使自己做，因為我唔鍾意化妝！」
至於林夏薇提到早前生日上載泳裝照，她說：「啲相之前影落嘅，生日要開工。（老公送咩禮物？）要嘅咩？（送BB？）點解人人都問我呢樣嘢？你哋唔好咁心急，我打算做嘢先！」陳家樂則自爆欠夏薇人情，他說：「佢知我鍾意曼聯名宿，送咗球星傑斯、加利仔簽名波衫畀我，好多謝佢，我欠佢一個好大嘅人情，會搵機會報答！」
文：影視組