陳明憙被鬧慣 唔敢駁嘴
歌手陳明憙（Jocelyn）經常被人讀錯名，原來名字是經高人指點，要用開心遏住她的怒火。至於因Jocelyn決心闖樂壇，令到本想退休的父親陳少琪都打消念頭，原來每當談到音樂，平時慈父即時變嚴父。
父親是著名音樂人陳少琪，可以話Jocelyn未出世，老竇已經為香港的天王天后寫歌，來到2017年，遺傳着父親的音樂天賦，Jocelyn親自創作首隻廣東歌，將以「黑、白、灰」三部曲進行，而父親亦會出手為歌曲填詞。講到與父親談工作，Jocelyn說：「平時爸爸都好搞笑，但一講到音樂，反差就好大，唔可以講笑。（阿女都照鬧？）會呀，成日都鬧我嘅，但我都慢慢明白，佢係想保護我，同教識我嘢，所以我都唔會駁嘴。」
24小時開會
Jocelyn指對爸爸來說音樂既是興趣又是工作，所以當和爸爸在家時，感覺似24小時都在談公事：「有時連食飯都講，我就會講句『又開會？』但其實爸爸咁多經驗，佢肯分享畀我聽都好開心嘅。」談到做歌手後，令父親變得不輕鬆，Jocelyn不禁說：「佢成日講『如果唔係你，我都可以退休輕鬆啲，去砌模型啦！』所以我都想快啲做出成績，等佢唔使咁擔心，其實爸爸佢咁熱愛音樂工作，冇得做佢都唔開心嘅。」
火氣猛要改名
談到中文名「陳明憙」，發現經常被寫成「熹」字，更有人叫她陳明「熹」？Jocelyn說：「係呀，所以每次見到人哋冇寫錯我個名都好感動，『憙』音係『喜』，好多人以為『熹』，兩個字係好似，又唔怪得人。」而用「憙」字是有因由，Jocelyn說：「出世後就有位高人叔叔幫我改，佢同爹哋媽咪講，話睇得出你哋個女第時長大個心裏面嘅火氣好猛，所以要用個『憙』字，用開心去遏住心入面嘅火。」Jocelyn稱其實熱愛搖滾音樂，可能就是遏住團火才沒有展示出來。
文：音樂組
化妝：Circle Cheung（ndnco.co）
髮型：Ziv Yeung（www.pi4.com.hk）
鞋：Hogan