「文青女神」視林嘉欣為目標 楊偲泳眼闊肚窄 擇偶愛「食物焚化爐」
非一般文青女神楊偲泳（Renci）擁有超深酒窩，猶如年輕版林嘉欣。喜歡睇書及攝影的她性格開朗，更曾是排球隊成員，可謂動靜皆宜！講到擇偶條件，Renci笑言喜歡運動男，並笑說：「我眼闊肚窄，佢要接收我食唔晒嘅嘢！」
獲封為「文青女神」的楊偲泳（Renci）深得網友喜愛，被睇好是90後潛力新星，曾拍攝JW《矛盾一生》MV及吳業坤《第一次告別》MV，又演出ViuTV節目《SE7EN》與劇集《詭探》，網上人氣愈來愈盛。
對於被封「文青女神」，Renci的確喜歡睇書、寫字及影相，Instagram亦上載不少親自拍下的風景照，她說：「我鍾意做文青鍾意做嘅事，但我覺得真文青係知書識禮、出口成文，我距離好遠！」
性格佻脫愛運動
不過Renci性格可愛佻脫，熱愛運動又開朗，訪問期間她不時傻笑，絕非一般予人感覺內斂冷酷的文青，她笑說：「人哋話我唔出聲都呃到人，哈哈！」問到揀男友是否也要跟她一樣愛影相？她說：「影相係其次，我好鍾意運動，另一半都要做運動，同埋我好為食，但又眼闊肚窄，好快就飽，男友要接收晒我食唔晒嘅嘢呀！」
自覺似雀仔翠兒
樣貌Sweet爆的Renci有超深酒窩，有影后林嘉欣影子，她亦視對方為奮鬥目標：「最多人話我似林嘉欣，梗係開心啦！我好鍾意佢，以前睇佢套《戀愛行星》，已經覺得佢好Sweet，我仲因為佢而鍾意食Tiramisu，近期啲佢嘅《百日告別》，睇到我抖唔到氣，估唔到咁甜嘅人可以演到咁，仲要笑住自殺！我都係想向電影方面發展，會視嘉欣為目標。」
除了嘉欣，Renci亦被指是多位靚女的混合體，她笑說：「最驚喜係畀人話我似鍾楚紅，我有睇《縱橫四海》，但聯想唔到呀！佢嘅Level太高喇！另外有人話我似陳妍希，但我覺得最似係翠兒嗰隻黃色雀！哈哈！」
文：立影
攝：司徒國榮
場地：焱丸水產
服裝：PENNY BLACK
鳴謝：Barry@J&B Ent