伍樂怡電眼跌Watt 張寶欣袋定Tips迎戰

無綫《2017香港小姐競選》的12位參選佳麗昨日在尖沙咀正式首度會晤傳媒，近年港姐決賽均設TVB fun全民投票，讓觀眾選出心水佳麗，但今年賽制有所不同，三甲均由一眾評判選出。無綫非戲劇經理暨監製陳旭亮表示，觀眾可透過big big channel的港姐專區參與盛事，而眾佳麗將於7月26日至8月1日到台北拍外景，亦不排除日後會採取淘汰制。

勤敷Mask補數

記者會上，藝人張寶兒胞妹張寶欣（Boanne）和「仙氣李若彤」伍樂怡（Kelly）兩大風頭躉依舊成為焦點，其中Kelly以白色吊帶背心仔亮相，可惜Bling Bling大眼卻比之前跌Watt，比起表現淡定、掛上Sweet爆笑容的Boanne較為輸蝕。Kelly受訪時承認睡眠不足搞到電力大減：「尋日都有練舞，夜咗少少。（有心理準備之後都會唔夠瞓？）都有心理準備，惟有敷多啲Mask。」又不認為出眾身材是優勝之處：「係平均。（泳裝環節更有信心？）冇諗過。」

12位候選佳麗正式見傳媒，各觀眾可透過big big channel的港姐專區參與盛事。	「仙氣李若彤」伍樂怡唔夠瞓，難怪看來有點累。	何依婷因壓力大而皮膚變差。

何依婷生壓力粒

盡得胞姊真傳的Boanne則坦言成為焦點後感到壓力，但指媽媽的壓力比自己更大。問家姐給她甚麼貼士，她笑指有問對方如何搭車：「佢有同我揀衫，一齊行街。（你自己叻咩？）笑！（齋賣笑？冇嘢叻？）哈哈！」至於同樣靚女的「翻版龐卓欣」何依婷（Regina）則被發現額頭生小粒粒，她相信情況會慢慢改善：「呢排瞓得唔好，有少少緊張。」

文：影視組