林海峰自薦演舞台劇秋生笑疑幻疑真

藝人黃秋生與林海峰九月將聯手在演藝學院演出舞台劇《搞大電影》，秋生除了是影帝、視帝，更是舞台皇帝，林海峰的Talk Show亦獨步香港，今次合作可謂因緣際會，林海峰笑說：「上次開騷，我就同秋生自薦，開出條件好優厚，我好得閒、好平、好想做，有機會可唔可以畀我試吓呢，秋生就畀咗個機會我，開頭我以為係假嘅，以為係吹水。去睇佢舞台劇《仲夏夜之夢》，秋生話差唔多喇喎，心諗死喇，嚟真喎，都驚嘅。」秋生亦笑說：「我初頭以為係真，點知見到佢就以為係假，最後打電話畀佢又覺得係真嘅。」

當年劇本被挑剔

林海峰笑言很害怕秋生，怕得不敢正視，劇中也不停被秋生狂插，但亦有反擊怒打秋生的戲份，林海峰笑說：「當年寫廣播劇搵咗秋生客串演出，秋生攞住劇本入咗錄音室一陣，突然間黃秋生出番嚟，你呢啲咩嚟（口架）？上面唔接下面，係同一個人講？我哋當堂呆咗，然後佢整番通順去錄。」他又講到與秋生20年前拍攝電影《誤人子弟》，他笑說：「當時係葉偉信導演、谷德昭監製、徐子淇主演，呢個組合真係可遇不可求。有啲訪問問我哋拍《誤》同依家有乜分別，我哋都係咁上下，可能問徐子淇就好睇啲。」秋生則說：「我外表同裏面都差好遠，第二個人咁，有時都唔係好認得自己。」

盡揭影圈荒謬事

《搞大電影》講述影圈的荒謬事，笑中有淚，秋生說：「套劇定調係要搞笑，香港已經夠悲、多事，再唔笑吓，我自己都唔想演，唔好笑搵佢嚟做咩﹖」林海峰說：「我係貪好喊，笑中帶淚，劇本好感動。」林海峰指今次演舞台劇是學習，秋生則認為林海峰的Talk Show難好多，他說：「有諗住試吓，依家放棄咗，唔知個技巧，諗住借呢個機會請教吓佢。」

文：影視組

攝：劉斌