鄧達智「出櫃」「逼」醫生男友訂婚

現年59歲、曾患乙結腸癌的鄧達智近年身邊有位外科醫生同性密友Clement，從未承認同志身份的William昨日公開出櫃，大膽認愛，表示於Clement生日當天在眾好友的見證下與他訂婚，兩人戴上訂婚戒指及切蛋糕，儀式雖簡，但情意深。

現時身在檳城的William昨日接受電話訪問，他稱不愛用「訂婚」這個傳統字眼，他以英文「Engagement」形容，問到為何選擇在Clement生日當天跟對方Engagement？他笑說：「係我逼佢，其實佢需要多啲時間去考慮，佢知道有戒指收，但以為係生日禮物。（你當時有冇跪地？）哎吔！我冇做呢樣嘢添！爭咗。（佢個人好好，所以你先決定咁做？）呢個係佢嘅優點亦係佢缺點，好人得滯。」言談間充滿對Clement的愛意。

「佢嘅勇氣大過我」

William今次一改作風，大方承認同性戀人，他解釋因為在對的時間遇上對的人：「以前係唔相信，但今次遇到一個令你心悅誠服嘅人，即係Right Time遇上Right Person，呢個機會唔係一定人有我有，同埋我都獨身咗咁耐。後來大家自自然然就喺埋一齊，我覺得呢啲就係人生，自己都估唔到咁幸運可以經歷呢個過程，可能你遇到一萬個人都未必遇到呢一個。」

交換戒指 鄧達智為Clement戴上訂婚戒指，場面簡單而甜蜜。

連體坐鞦韆 鄧達智孖Clement到檳城旅行，兩份坐一個鞦韆。

至於會否覺得出櫃很有勇氣？他認為Clement比他的勇氣更大：「因為佢嘅工作係比較傳統，佢係醫生，我份工就反叛啲，所以對佢嚟講，佢嘅勇氣大過我。（你同家人講咗未？）佢父母已經唔喺度，佢妹妹又喺外國，我屋企啲家族成員都各自成家，我哋都係無父無母，我哋都係孤兒，所以唔需要向人交代。」

結婚揀佛羅倫斯

問到下一步會否結婚？William坦言暫未考慮，但並非沒有可能：「如果結婚會揀喺意大利佛羅倫斯，我已經計劃將來退休會喺嗰度生活，而且佢都好鍾意佛羅倫斯。（依家係咪一齊住？）唔會，大家都有大家嘅工作方式，而且工作時間又唔同，唔需要一齊住，但會多啲時間一齊。」他指Clement比較怕醜，平時甚少說話，所以對方不便回應。

William現時跟Clement及一班朋友在檳城旅行，但否認度蜜月，他稱早半年前已計劃好一齊去檳城食榴槤，今天便會返港，兩人在旅程中拍了不少靚相，相中兩人齊齊坐在一個鞦韆上，非常浪漫甜蜜，很有初戀感覺，他們又在立體壁畫上大擺搞鬼動作，十分合拍。

William一直十分欣賞Clement的為人，曾經在其文章提到Clement在中學時已到菲律賓做義工，於醫學院第四年時選擇到南非實習，雖然在當地被搶劫，但他仍在執業後擔任無國界醫生，到蘇丹、伊拉克等地服務，生命受到威脅，亦曾協助產婦剖腹生子，所以當William聽到Clement的經歷時十分感動，因而種下愛苗。

文：名人組