「仙氣」Kelly拉隊玩小圈子「佛地Moon」孤獨睇騷

《2017香港小姐競選》61位參賽者前日在將軍澳電視城進行複選，晚上8時許，眾人乘坐大會小巴到日出康城站轉乘港鐵，身為大熱門的「仙氣李若彤」Kelly竟未能「入閘」，認真「大吉利是」！原來她的八達通不夠錢，同行幾位佳麗有義氣地等埋她，增值後Kelly終順利入閘。

玩自拍增進感情

等車時，一眾參賽者已急不及待變身「低頭族」，動作一致地用手機查看港姐新聞，上車後更雞啄唔斷地討論，到將軍澳站時，不少佳麗落車轉車。以Kelly為首的熱門佳麗包括貌似朱千雪的「白富美」Nicole Wu、Elsie Chan、張寶欣、Yuki Leung及杜芷綾（Zoe）埋堆組成「索派」，她們與其他佳麗道別後，Kelly便率領一眾姊妹到商場一間西餐廳開餐，等位期間，Nicole Wu拿起手機為大家自拍，增進感情。吃了個多小時後，眾人於10時許離開，Kelly與Nicole Wu兩大熱門孖住前往搭的士。

啋！入唔到閘！ 大熱門Kelly大吉利是地「入唔到閘」，急急轉身為八達通增值。	篤機睇新聞 等車期間，一眾佳麗心急地查看有關港姐複選的新聞。	N個女人一個墟 Kelly與一班好姊妹雞啄唔斷，人緣不俗。

抹鼻影自嘲「真咗」

這邊廂一班熱門「索派」玩埋堆，齊齊食飯熱鬧又開心，相反因鼻子惹加工疑雲而被封「佛地Moon」的Moon Ho則大玩「獨家村」，前往欣賞Britney Spears演唱會。她在社交網上載睇騷的照片，留言自嘲：「抹咗個鼻影有無『真』啲啊個鼻」，又笑言「下次唔敢咁重手啦」。

「佛地Moon」抹走鼻影才睇騷，強調鼻子應比較「真」。	開心自拍 在餐廳等位時，Nicole Wu舉機為大家自拍，非常Nice。	孖住走人 兩大熱門Kelly（左）與Nicole Wu孖公仔搭的士返歸。

另一佳麗「騰雞雪兒」Christina則在社交網寫下千字文抒發心情，又表示與朋友Mike製作了短片用廣東話大談參選感受，片中她與Mike表現親密，似洩露了甜蜜關係。

文：影視組

攝：秦健輝