張智霖電影節屍襲 拋斷肢靠嚇

影星張智霖近日忙於在上海宣傳,適逢媽咪由澳洲返港,孝順的他索性帶同母親遊上海,爭取母子相聚時間!心情大靚的張智霖在記者會上搞笑將布置的假嬰兒屍體斷腳拋落台,嚇親觀眾!

張智霖(Chilam)昨日在《上海電影節》連番亮相宣傳新片,因居於澳洲的母親最近返香港探親,孝順的他為爭取家庭樂時間,索性帶埋媽咪到上海陪開工,趁不用工作時四出遊玩,他說:「有帶佢吃喝玩樂同睇風景,本身想帶佢再去周圍玩,但之後都多工作,惟有蜻蜓點水玩過就算!之後又要宣傳電影,又同吳鎮宇、佘詩曼去檳城拍邱禮濤新片。」

Chilam先與鍾欣潼(阿嬌)出席新片《京城81號II》發布會,大部分演員穿上民國服飾亮相。飾演民國少帥的Chilam有原配夫人梅婷與姨太太阿嬌相伴,享盡齊人之福!作為「屋主」的他為慶祝鬼宅搬到上海,帶同張媽媽一起慶祝另類「喬遷」,讚媽咪天生麗質,令他也遺傳到優良基因。期間,貪玩的Chilam將台上背景布置的嬰兒屍體斷腳道具拋下台嚇觀眾,場面搞笑!阿嬌則透露片中與梅婷展開女人間的戰爭,並離奇誕下駭人怪胎。

阿Sa怕咗睇恐怖片

其後,Chilam與蔡卓妍(阿Sa)、佘詩曼、林雪及雨僑宣傳將於萬聖節檔期上映的電影《常在你左右》,眾人鬥講鬼古及拍攝時的奇怪經歷。Chilam表示最難忘片中肢解林家棟:「平時劏雞都唔會,今次就要將林家棟條屍肢解,個感覺好特別!今次導演係拍過《人肉叉燒包》嘅邱禮濤,肢解呢啲例行公事啦!」阿Sa則自爆小時候已很怕睇恐怖片,到現在亦未能克服。林雪提到跟角色有關的道具「黑膠碟」時,普通話發音似足粗口,全場大笑!

文:影視組