歐陽巧瑩解除束縛氹阿媽唔戴bra

藝人歐陽巧瑩（Tammy）為響應「解放乳頭運動」，日前與男友林師傑到美國旅行時身體力行，穿工人褲拍騷半球照片，表示要「Free The Nipple」，不讓胸圍箍實！照片曝光後引來廣大回響，昨日Tammy再公開幾張性感照，打扮潮爆的她真空凸點上陣，另一張則穿上白色超高衩服裝，在露台凝望風景，S形身材夠晒火辣！

有着衫被指小器

「解放乳頭運動」於2010年開始，一直獲不少外國藝人支持，目的是追求性別平等。Tammy接受電話訪問，對於有人戴有色眼鏡看此運動，她說：「好多人好奇怪，以為呢個運動係要成個胸拎出嚟！有人話我着住衫叫咩解放，亦有人發訊息叫我唔好咁小器，下次應該要唔着衫，我都唔想理呢啲人！佢哋要深思活動原意係要解開束縛，其實唔戴bra已經係一個動作，唔通吓吓咩都騷晒畀人睇咩？（有冇諗過反應咁大？）冇諗過，當初純粹覺得好睇就公開，可能香港人少咁樣解放。」

歐陽巧瑩沒有望鏡頭，流露不經意的性感。

只要不是意淫，歐陽巧瑩不介意性感影相。

身邊人一致讚靚

問到身邊同事及家人的反應如何？Tammy表示獲得一致好評：「台前幕後都話好靚，唔係核突意淫、特登烏低身嗰啲，係不經意咁影出嚟，大家反應都好正面。（父母呢？）冇咩特別反應，有讚啲相嘅，佢哋本身都開放，除非係影啲好cheap嘅動作。（叫埋媽咪響應？）有傾過，阿媽笑住話諗住有一日都會除，佢話幾時見過阿婆戴bra吖！」

文：影視組