65歲洪金寶恨抱孫女 天明叫細佬幫手
武打影星洪金寶與洪天明日前「父子檔」接受訪問，期間洪金寶催兒子多生BB：「佢依家有能力，所以快啲生，我有能力我都生呀！」天明搞笑指希望弟弟們「分擔」重任：「希望我弟弟都幫幫手，早啲結婚。阿爸成日係咁追住我，好辛苦，叫我交貨咁！」
65歲洪金寶與兒子洪天明日前宣傳新片《蕩寇風雲》，兩人坦言於片中無對手戲，但分別與趙文卓打到飛起。洪金寶直言多年來首次與趙文卓合作，自稱是打戲的「萬能插蘇」：「任何國家嘅對手，我都可以夾到個節奏位。」
未能與父親對打的天明大表可惜，但透露正籌備由他與兩位弟弟及爸爸合作的劇本。早前天明自組工作室，問洪金寶日後會否以「父子價」與天明合作？他說：「我唔收平啲，我寧願收貴啲。你想平幾多，私下畀番你就得，因為公司有公司政策。」
送孫仔去少林寺
問天明會否考慮讓兒子洪大仁及洪竟琋參演電影，實行「一家親」演出？他笑言暫未考慮。他又透露近日見家長時，被告知就讀幼稚園的洪大仁因專注力不足而有機會留班，令太太周家蔚相當擔心，洪金寶即提議送洪大仁去少林寺學習紀律及服從性，天明笑說：「遲啲再講，或者暑假去都好。不過我擔心佢去完少林寺返嚟，一揪幾（人）呀！」
「叫我交貨咁」
問洪金寶是否想繼續抱孫？他即豪言表示有能力都想繼續開枝散葉：「想，點解唔想？（天明話你恨抱孫女？）佢依家有能力，所以快啲生，我有能力我都生呀！」天明笑稱希望弟弟們盡快成家立室：「畀少少時間吖大佬，唔係我有冇能力，係老婆辛苦。我同老婆同爸爸都鍾意女，過多兩年會試追女。希望我細佬都幫幫手，早啲結婚。成日係咁追住我，好辛苦，叫我交貨咁。」
文：影視組
場地：香港沙田凱悅酒店