劉佩玥路邊揀Bra「缽仔糕」買嚟托
最近與「巨聲幫」周志文傳緋聞的劉佩玥，日前相約好姊妹歐陽巧瑩行街，雖然冇仔陪但全程春風滿面，頻頻甜笑傾電話。兩人在路邊檔睇Bra時買了有Push up效果的「缽仔糕」，想「餵」邊個食呢？
前港姐劉佩玥（Moon）與「巨聲幫」的大孖周志文被指「秘撻」數月，不時孖住到好友翟威廉家中Jam歌做網上直播，一彈一唱非常合拍。兩人例牌否認戀情，只稱對方是相識已久的好朋友。
雖然Moon唔認有新戀情，但近日經常春風滿面，容光煥發！日前晚上7時許，Moon收工後駕車載住好姊妹歐陽巧瑩到尖沙咀Shopping，泊好車後便步往附近商場閒逛。
喪傾電話 不時甜笑
向來打扮性感的歐陽巧瑩，早前與男友林師傑蜜遊美國時豪晒半球，但當日竟然包到冚，反而一向密密實實的Moon穿上熱褲大騷一雙長腿。兩女在商場內行完一間又一間時裝店，但最終齋睇冇幫襯。大熱天時，兩人途經雪糕店時，即急急前往購買，並於店外「立食」，邊吃邊傾相當寫意。
食完雪糕，Moon走到附近一間路邊內衣店，與歐陽巧瑩一起研究，即使有途人認出眼望望，但兩女依然未有尷尬，繼續左揀右揀，最後選購一對有Push up效果的缽仔糕（Nu bra）。其後，兩人再轉戰附近小食店，買了一些魚蛋、雞蛋仔等外賣小食，期間見Moon不時甜笑傾電話，未知跟誰報告行蹤呢？然後往停車場取車離開。
文、攝：追蹤組