樂基兒8月再婚嫁食品商Ian

Gaile於2008年秘密與天王黎明結婚，消息震驚娛樂圈，但兩人婚姻只維持了四年便告吹。卸下天王嫂銜頭，戀愛大過天的Gaile不愁寂寞，曾與新西蘭籍滑水教練Denim拍拖，兩年前結識圈外生意人Ian。一向愛得光明的Gaile，去年元旦在社交網站上載與Ian合照，公布戀情！

拍拖兩年，二人不時被拍得一起做運動及去超市買餸煮飯，過着甜蜜同居生活，因此不時傳出兩人結婚報道，日前再有消息指Ian向Gaile求婚成功，更計劃八月拉埋天窗，而Gaile近日又被拍得肚凸凸疑似有喜，莫非雙喜臨門？本報記者向Gaile求證？敢言的她大方承認婚事，更自爆早於去年八月已經訂婚，由於二人都是再婚，故婚禮不會鋪張。

草原求婚 未婚夫到「四野無人」的涼亭，買齊鮮花、香檳及戒指向樂基兒求婚，得咗！	放大圖片	放大圖片

求婚「四野無人」

即將再榮升人妻的Gaile接受訪問時，甜蜜透露再婚心情：「我哋會喺8月結婚，會喺美國加州舉行婚禮，婚禮係一個好小型、簡單，屬於我哋兩個嘅派對，只有大概50人參加，主要係我哋父母同親友。（返香港再擺酒？）返嚟唔會擺酒，所有儀式會喺美國完成。（未婚夫有乜嘢打動你會再婚？）唔話畀你知，哈哈！」

行事低調的她，原來早於去年八月已跟Ian訂婚，問到求婚過程？Gaile甜笑說：「舊年八月我哋喺美國放假，嗰排差不多係我生日，嗰日Ian着住一套西裝，又叫我要着得隆重啲，我以為佢係為我慶祝生日，所以都冇為意。佢帶我去咗加州北部嘅小鎮Sonoma County，去到先知係求婚，我以為係切蛋糕，點知係收戒指，我好驚喜，嗰個地方四野無人，係佢上網搵嘅，只有一片草原同一個白色涼亭，佢預備咗餐枱，上面有鮮花、香檳同戒指，因為周圍冇人，所以我哋合照都冇，張合照喺我腦海裏面，哈哈！」

冇生B計劃

近日Gaile被拍得身形翻脹，問到是否雙喜臨門？她否認其事，表示暫沒有生B計劃，發福只因戒煙：「我下星期會去泰國上瑜伽導師訓練課程，呢個課程要你無煙訓練呼吸，如果你唔戒煙又去上堂，咁就冇意思。其實我一直都想戒煙，因為健康同覺得好臭，戒咗煙後成日想食pizza，所以肥咗，但我返嚟會瘦番啲啦，近年我接觸咗瑜伽之後，覺得改變咗好多，令我一年好過一年，希望成功戒煙！」恭喜Gaile再覓到真愛！至於Gaile的前夫黎明，至截稿前仍未有回覆。

文：名人組