蔡卓妍分享愛同阿嬌唔使爭
藝人蔡卓妍（阿Sa）、鍾欣潼（阿嬌）、衛詩雅、盧巧音及鄭希怡（Yumiko）等昨日到灣仔出席英皇電影《原諒他77次》×「閨蜜分享愛」宣傳活動分享愛情觀，吸引數十Fans撐場。
阿Sa笑言起初不清楚要分享甚麼：「以為係同青少年交流吓，原來係講套戲，分享關於愛嘅嘢。（會唔會講以前啲戀情？）睇吓大家問啲咩囉！（擇偶條件？）最緊要佢愛我、我愛佢！（同阿嬌鍾意埋同一個人？）梗係冇，從來都冇！」她又透露Twins將於本月22日出碟，亦正在準備演唱會。
衛詩雅被舊愛投訴似「撞邪」
至於Yumiko笑言不介意分享情史，亦不怕老公詐型，講到是否多數飛人？她笑說：「係呀！但又唔可以咁講，係發現問題會提出，都係和平分手，做番朋友。（飛過幾多個？）五隻手指數得晒。」而衛詩雅指現時擇偶最緊要能溝通，明白其演員工作：「有舊愛話同我拍拖好辛苦，可能我拍戲期間，演開心角色就好開心，沉重角色就變另一個人。（有冇介意你拍親熱戲？）冇，係覺得我性格轉變似撞邪。」
另外，阿Sa昨日與周柏豪到電台宣傳《原》片，提到之前做宣傳玩測謊機，問柏豪喜歡打籃球還是陪老婆，他說：「講大話答打籃球但測謊機冇電我，即是我係講真話，好在老婆冇嬲，但耳仔有點痠軟。」他又謂細時有聽阿Sa的歌，是其前輩，令阿Sa大發嬌嗔。
文：影視組