陸漢洋承諾寵苟芸慧一世

女神苟芸慧封盤了!她與賽車手陸漢洋(William)早前高調認愛,獲男友送贈亡母的家傳鑽戒作為定情信物,正式被「落訂」。昨日二人十指緊扣出席活動,正式宣布拍拖,William更揚言要寵女友一生一世,並承認已有結婚計劃。

身為「處女黨」最後一員的藝人苟芸慧(苟苟)昨日與男友陸漢洋孖住出席活動,除宣布擔任男友創立的賽車隊的星級形象大使及做車手外,還十指緊扣高調承認拍拖。早前苟苟更被「落訂」,獲男友送贈亡母的家傳鑽戒作定情信物。

找到「外星人」

問到是否好事近?苟苟冧爆望住男友反問:「係唔係呀?」William更透露送戒指的原因:「媽咪叫我搵到人生伴侶就送畀佢,再傳畀將來嘅小朋友,我終於喺地球搵到我要嘅外星人!隻戒指係媽咪留畀我嘅,改咗男裝,再將媽咪另一隻設計成情侶款,送畀佢。(幾時送?)係驚喜,佢有一日因不實報道唔開心,原本佢生日先送,但我嗰刻忍唔住,佢因為咁唔開心好傻,我又心痛,所以送嚟氹佢。」苟苟直言覺得好感動。

收買女友家人

雖然不是求婚戒,但William已視苟苟為結婚對象,並已計劃好結婚,但要保留驚喜,加上彼此溝通過,只是時間地點問題,他說:「首先依家唔使驚佢say no,慢慢嚟,唔好一次畀晒驚喜。(要寵佢一世?)係,寵一日唔得,一生人承諾,佢係一個女神,佢行出嚟畀人知封盤,好多謝佢。」更直言不見女友幾日,已經好掛住,二人更互給101分!苟苟亦稱父母對William很滿意,大讚他有責任感,有好消息會公布,William則打趣說早已收賣其家人!至於二人是否同居關係?William笑說:「係鄰居!」

另外,玩具大王蔡志明女兒蔡加敏與老公馬鴻銘亦有現身,馬鴻銘大爆老婆愛開快車,但好安全,加敏說:「家族遺傳好鍾意高速掟彎嘅感覺,細個會同爸爸一條車隊咁開快車,不過之後覺得好危險,都係慢慢開好。」

文:名人組