英國43歲超模姬摩絲（Kate Moss）出道多年，身家有逾8,000萬美元（約6.2億港元），坐私人飛機幾乎多過坐車的她識飲識食豪到慣，大至豪擲100萬英鎊（約1,010萬港元）搞世紀婚禮，細至度假時都要擲千金搵人越洋送運心水電子煙，堅係有錢冇問題！
名模姬摩絲着慣靚衫現身各大活動，自己的婚禮更加不能求其，2011年下嫁The Kills結他手Jamie Hince時，便在英國格洛斯特郡豪擲逾千萬港元搞婚禮！除了着上著名設計師John Galliano的婚紗外，她又花大量金錢於教堂附近設立一個2.7哩範圍的禁區，搵來35名警員與保安幫手封路及保障婚禮順利進行，再聘請大量私人保安進行巡邏，並斥資1萬英鎊（約10.1萬港元）請警方提供加班服務。
結婚派對一連三日大搞，姬摩絲搵來歌手Beth Ditto、Snoop Dogg、Shirley Bassey、Iggy Pop及Bryan Ferry等演出，玩完即坐直升機度蜜月，堅擲千金玩到盡！至於她手上的復古鑽戒亦價值6.7萬英鎊（約67.7萬港元），相當唔嘢小。
除了婚禮豪過人，姬摩絲平日生活都好有要求，2013年，她到地中海福門特拉島度假時，發現帶漏食開的電子煙，即時要求工作人員由倫敦為她帶到福門特拉島！知情人士指姬摩絲食煙多年，近年因皺紋與其他衰老徵狀而決心戒煙，搞到用作頂癮的電子煙不離手，她當時搵司機飛越850哩到度假地，不但支付300英鎊（約3,030港元）機票錢，更畀埋1,000英鎊（約1.01萬港元）酒店住宿費再加幾百英鎊雜費，食口電子煙都使逾萬港元，堅係奢侈生活！
姬摩絲對自己出手夠豪，對好友就更加闊綽！2013年，她向相識15年的影星好姊妹莎迪霍絲 （Sadie Frost）送上價值2.5萬英鎊（約25.3萬港元）的名貴鑽戒，賀對方48歲生日，有傳搞到莎迪男友James Gooding嬲爆風頭被搶，知情人士說：「姬摩絲為莎迪嘅48歲生日搞到好大，真係想寵吓老友，但James一見到份名貴禮物就嘲笑！佢認為禮物好好但唔係朋友送畀朋友嘅禮物，更唔係一份生日禮物！」有指James的禮物被比下去，心情唔多好，但好彩兩姊妹的感情從未受影響，近日仍不時結伴開P。
出道多年的姬摩絲使得咁豪，當然要搵到金Support！雖然現年43歲兼近年離開天橋，但她的吸金力依然強勁，多次入選《福布斯》（Forbes）年度最高收入模特兒排行榜，去年又靠代言及接拍廣告等勁賺500萬美元（約3,900萬港元）排名第13位。她在去年親身開模特兒公司「Kate Moss Agency」發掘新星，開業一年便勁賺110萬英鎊（約1,111萬港元），有分析員大讚姬摩絲識以名氣賺錢，公司大有發展！
文：外娛組