方珈悠OL誘惑 愈做愈過癮
以歌手身份於2008年出道的方珈悠，為圓歌手夢想而放棄家族生意，三年後在樂壇急流勇退，近年加入母親公司當OL一族，放下內斂性格，逐漸改變自己，由零興趣到現在會研究化妝品，她更訂下目標希望創立自家品牌，雖然未知結果如何，但只要邁步前行，必有回響。
阿媽變上司 發「老闆」脾氣
前歌手方珈悠（Jaime）於2008年出道，同年推出首張個人大碟，曾獲叱咤樂壇生力軍女歌手銅獎及新城勁爆新登場女歌手，但於2011年淡出樂壇。Jaime近年由幕前轉型當商界女強人，在母親開設的化妝品代理公司任職，繼承家族生意，在商界打出一片天。
Jaime於六年級便移民加拿大，在大學修讀經濟的她畢業後未有按家人期望到母親的公司幫手，毅然入行當歌手，縱然如此，家人仍尊重其決定，令Jaime加倍感激，她說：「家人向來都畀我好大自由度，畀我去發掘自己嘅興趣，覺得趁後生乜都要試，唱歌一直係我嘅興趣，我好感激父母畀我去試我鍾意嘅嘢，當年畀我入娛樂圈，因為好多父母未必會贊成，我覺得到依家係時候去做佢哋原本想我做嘅嘢。」
入行後培養興趣
母親從事化妝品代理多年，十年前自設公司，Jaime今年才開始成為公司的全職員工，她坦言從來沒有想過會做化妝品生意：「以前好抗拒做生意，覺得自己唔係呢方面嘅材料，而且我由細到大對化妝品冇乜感覺，身邊朋友會好癲咁買化妝品，但我好少買，不過入咗呢行後，我培養到興趣，會去留意同研究唔同品牌嘅化妝品。」
對Jaime來說，比起接觸一個陌生行業，原來跟家人工作的挑戰性更大，身份由母女切換為上司下屬的關係，令她頗難適應：「返到公司要當佢係另一個人，唔可以當係屋企人，我喺媽咪間公司做嘢嘅心情，同出去打工始終唔同，會有少少依賴，但我要不斷提醒自己，佢係我老闆，老實講，如果對方真係你老闆，你係唔會同佢發脾氣，但我有試過衝口而出發脾氣，因為真係好難突然轉Channel。工作上會有好多爭拗，有時大家諗法唔同，而且媽咪對我特別嚴格，當然有時會面左左、唔出聲，不過我哋母女關係向來好好，好快就冇事。」
再戰樂壇 屢受打擊
Jaime自覺是一個內斂的人，當歌手時已被批評不適合娛樂圈，但無奈天生性格如此，到涉足商界，她發現原來跟人的互動比在娛樂圈還要多，做事還要更進取，她也逐漸改變自己：「我向來都唔係第一個敢舉手講嘢嘅人，但出嚟做嘢，就唔可以被動，你要出聲，有咩構思同想法都要講出嚟，就算你覺得係好蠢嘅想法都要講，而且好多嘢都唔可以出錯，要好認真，反而以前做娛樂圈感覺輕鬆啲。因為係屋企生意，可以話係24小時都做嘢，放工冇得唔諗，就連放假都要做嘢。我返工都冇胃口食嘢，所以係無形壓力造成。」
謀創自家品牌
去年九月其公司代理一個澳洲化妝品牌，該品牌首次引入香港，在港開設的專櫃更是亞洲首個專櫃，一切由零開始做起，宣傳等各方面Jaime也要親自負責，但在困難當中不乏成功感，她更訂立目標，希望將來可以推出自家品牌的化妝品。
現時主力做OL的Jaime，也有簽約模特兒公司，兼職做Model，至於有否想過回歸樂壇，她坦言已經過了這個階段：「前兩年都會有，當時有見過其他唱片公司，有幾次好大期望，但最後都傾唔成，打擊咗幾次，所以就再冇復出唱歌呢個心，我依家想專注化妝品事業多啲。」
異地情最怕喊
Jaime跟家人的感情非常要好，雖然Jaime與媽咪在港居住，與在加拿大生活的父親及胞弟長期分隔兩地，但每天仍會保持聯絡，未因距離而令感情變淡，她說：「我真係好佩服我父母，大部分時間分隔兩地，但家人關係依然咁好。我同媽咪一齊生活，大家乜都會講，我好怕同屋企人鬧交，因為見到對方喊會好心痛，我父母唔係經常喊嘅人，佢哋喊，一定係好傷佢哋嘅心。我都有試過反叛期，令佢哋好擔心，當時啱啱去加拿大，只有13歲，經常跟表兄弟出去玩，唔返屋企又唔聽電話，當時爸爸知道我變成咁，就好惡咁鬧我，我未見過佢咁惡，佢沒收晒我嘅嘢，又唔畀我出街。」
先創業後成家
在事業上算剛起步的Jaime，在感情上十分穩定，已有一位拍拖七年的圈外男友，雖已認定對方為結婚對象，但兩人仍未有結婚計劃，她解釋：「我哋有傾過結婚，但大家都想建立好事業基礎先，我啱啱開始投入事業，佢都係做家族生意，又有同朋友創業，大家為將來而努力，我唔想為結婚而結婚，因為我唔接受離婚。」雖然男友從商，但Jaime未有向對方取經，至於當年男友知道她決定退出樂壇時是否很高興，她笑說：「佢冇所謂，佢唔反對我做歌手，我哋好支持對方。」
文：陳嘉敏
攝：劉智源
化妝：Nude by Nature by Eliza
場地：Harvey Nichols Landmark