泳兒雌雄同體

外形嬌小玲瓏的泳兒（Vincy），憑藉一把靚聲在樂壇發展不俗，2015年，其母中風入院，突然之間她要獨自面對所有問題，頓成「一家之主」。轉眼已兩年，Vincy仍等待母親康復的一天，她說：「唔可以話佢身體好好，畢竟係一個好嚴重嘅病，但我覺得佢好堅強。雖然佢個腦傷得頗嚴重，未必可以有意識去認得你，但目前為止，佢身體狀況同機能都係唔錯嘅。佢依家神智都唔算好清醒，可以擘到眼囉！」

母親突然患重病，怎樣開朗的人也有疲累的一天，Vincy也不例外，要同時兼顧家庭與事業難免有壓力，她說：「我發現成屋得我一個女人，我依家變咗男人加女人，爸爸媽媽家姐都係我一個人去飾演。爸爸係一個比較易擔心嘅人，有時好多顧慮，我要安撫佢情緒；細佬我又覺得未夠成熟，所以屋企大小事都由我親自處理。」

爸爸容易擔心，弟弟又未夠成熟，泳兒只好身兼多職孭起頭家。	母親突患重病，泳兒心痛之餘，還要照顧屋企。	泳兒身心遭受巨大壓力，但仍樂觀面對，不想家人及朋友憂心。

健康亮紅燈

Vincy的健康亦亮起紅燈，早前突然嚴重皮膚敏感，她意識到可能是家庭帶給自己的壓力：「咁嚴重真係第一次，有日嚴重到我直頭喊添呀！成晚又痛又癢，但又要忍住，成個星期先去睇醫生，因為我唔想咁快就去睇醫生。之前我都試過咁，但做吓保濕就冇事，今次就唔得喇！（意識到要保養身體？）我以前冇咁嚴重嘅皮膚敏感，個胃又冇咩事，雖然我食無定時，但有次痛到我擔心要去做Full Body Check，呢啲都係無形壓力嚟嘅，可能真係屋企個膊頭好重，所以要搵渠道去發洩。（點發洩？）我會同人傾偈啦！同埋屋企養咗寵物，唔開心可以攬吓佢。」

泳兒在樂壇一直十分努力，希望做出成績，令家人放心。	男友Ziv是泳兒的最強後盾，陪她跨過重重難關。	泳兒話你知，即使只是小小的肩膊，力量也可無限大。

甜蜜倚靠：男友Ziv做Listener

家中沉重的壓力令Vincy兩膊愈來愈重，慶幸她找到一個可倚靠的膊頭。髮型師男友Ziv與她感情穩定，一直在她身邊給予支持，問到是否經常與男友傾訴？Vincy說：「咁又唔止佢一個嘅，好多朋友包括佢都係傾訴對象，可能有時佢哋未必可以行動上幫到，但有得傾訴都係一個發洩方法。」

不過，兩口子暫未有結婚打算，她說：「我依家太多嘢要兼顧，我嘅另一半又忙於工作，大家都覺得未需要去住（指結婚）。（結婚會公開？）唔會刻意隱瞞，但又唔會大事去講。（夢想將來結婚係點？）唔會喺香港舉行，想喺一個寧靜小島，請屋企人同朋友就算喇！因為唔想好似做騷咁。」

溫暖鼓勵：最緊要愛得及時

Vincy近日推出歌曲《搖籃曲》，以女性角度唱出與媽咪的生活點滴，她更首次擔任MV導演，希望將自己的想法用畫面呈現給觀眾，更找來媽咪級的黎瑞恩聲演，她說：「我覺得係一個緣分嚟，話說有一日深夜我唔係咁開心，喺Facebook寫話我好想撼頭埋牆，其實只係寫啫，覺得壓迫得太厲害。隔一日就收到有個唔識嘅電話打畀我，原來係黎瑞恩，佢喺Facebook見到我留言擔心我有事。（你哋本身認識？）係呀！但冇交換電話，佢問我同事攞我電話號碼，一直好感恩佢呢個舉動。做呢隻歌嘅時候，好想搵一把好溫暖嘅聲音，第一個諗起佢！」

首次做導演的Vincy找來不少朋友仗義幫忙：「好想用自己嘅經歷鼓勵大家，要珍惜每次溝通嘅機會，想將呢個想法話畀人聽，但又唔係好識表達，咁不如自己做導演啦！所以搵咗陳家樂幫我。（你有冇拍？）有呀，連唱片公司宣傳人員都幫埋我出鏡，同埋誠邀咗好多朋友幫我。」

文：林倩怡

攝：劉智源

場地：香港九龍貝爾特酒店

髮型：Keith Wong（pi4.hk）

化妝：Samantha Siu@miss10makeup

服裝：MO&Co.