區瑞強撩吳岱融剛柔合唱
「民謠宗師」區瑞強（Albert）一連四場「區瑞強40周年感謝您演唱會2017」前晚假伊館開鑼，嘉賓陣容鼎盛，有吳岱融、黎瑞恩、周慧敏、鄭子誠及組合C AllStar等，之後數晚更陸續有新嘉賓上陣，包括「鐵腳」譚詠麟、曾志偉及袁偉豪等。
昨日Albert接受訪問時感激好友「瞓身」支持：「張偉文話撐住拐杖，行唔到樓梯都要嚟支持我，仲有李司棋拍緊《溏心風暴3》都同劇組告假，張明敏專登叫埋喺北京個仔飛過嚟，要父子檔支持我，我最多謝支持我成40年嘅歌迷啦！」
年底擦出火花
談到邀來吳岱融開金口，Albert指其歌喉絕不遜於「奸到出汁」的演技：「岱融做過歌手o架，佢返咗新加坡發展時有唱歌，佢喺我度唱《星河傳說》同《中國夢》，真係唱得好有氣勢。」問他可考慮跟吳岱融在音樂上合作？Albert直認：「真係有傾合唱，希望年尾可以推出，我同佢唱歌一柔一剛先可擦出火花。」
重開音樂農莊
演唱會上，Albert自言歌手及DJ各做了40年，加埋有80年資歷，但現時62歲的他從沒想過退休：「我視工作為興趣，又冇要求做天王巨星，又冇諗搵好多錢，所以冇壓力，有得做就做。」至於將來大計，他透露將在大埔重開全新的「音樂農莊」：「呢個農莊有成120萬呎，有好多嘢。（投資好多？）好杰囉，但詳情遲啲講。」
文：音樂組