陳友做導演被投訴大細超

藝人陳家樂、王梓軒、吳鶴謙及溫拿成員陳友昨日出席電台訪問，大談拍攝以溫拿樂隊為主題的電影《兄弟班》的趣事，家樂大爆身兼導演的陳友最錫演其年輕版的阿謙，更呷醋表示：「導演對其他新演員好包容，拍完戲又會攬佢哋，但我喊到豬頭咁佢都冇攬我、冇安慰我，佢就話『你預咗咁o架啦』。」陳友笑言因演戲經驗豐富的家樂識照顧自己，又指當初找他飾演年輕版的彭健新備受批評：「大家都話彭健新邊有咁靚仔，但其實佢後生都靚仔，但之後相由心生，個樣隨住年紀變咗！我當初睇咗家樂套《幸運是我》，覺得佢演得好好，好躝癱，好啱演彭健新。」