JW吳業坤跨界合唱一日破18萬點擊

歌手JW(王灝兒)跟吳業坤首度攜手合唱新歌《原來只因深愛著》,歌曲上載一日(截至昨晚8時)已經有逾十八萬點擊,走勢凌厲!坤坤昨日在電話說:「開心呀,未試過有一首歌第一日就過十萬點擊,所以多謝大家支持,首歌籌備咗好耐亦好用心,叫做對班底、公司有個好好嘅成績。」

班底糅合二人經典歌

而JW跟坤坤屬兩間不同唱片公司,對於今次能夠跨公司合作,JW說:「好開心,第一次同坤坤合作,而且覺得好破天荒,因為依家呢個年代要跨公司合作好難,好難得我哋兩間公司咁開通。」

據知他們的新歌是將兩人的《原來她不夠愛我》及《矛盾一生》製作班底,包括兩首歌的作曲、填詞、編曲及監製一同創作,甚至兩首歌的MV男女主角都一齊參與新歌MV拍攝,連歌名亦有原曲影子。JW說:「由於我哋兩個嚟自唔同公司,所以今次合作係要兩間公司肯接受新嘗試同保持溝通先得。」談到新歌MV,JW賣花讚花香說:「呢個MV真係好好睇!我首《矛盾一生》嘅女主角終於搵到佢想要嘅,仲大埋肚!而男主角就同咗《原來她不夠愛我》嘅女主角一齊。至於坤坤呢,你哋自己睇吓啦!哈哈!」坤坤笑着回應JW:「我咪做金童,你就玉女,我哋係樂壇嘅金童玉女!」令JW笑到標眼淚。

此外JW同門師兄樂隊Yellow!(野佬)最近亦與另一隊樂隊組合RubberBand合作,他們將於6月在九展開騷,兩隊Band更為音樂會製作了主題曲《一生青春》,亦算是兩隊Band難得的合作。

文:音樂組