陳展鵬頸傷腳痛Chur爆乾塘
視帝陳展鵬拍劇搵命博，曾連續多天每日踩足19小時，兼且搞到頸及腳都有傷患。已8個月沒有放假的他直言望有沉澱期，讓自己「增值」再出發。拍檔唐詩詠於螢幕上略展身材後被封為「A Cup之城代表」，她大方回應：「我滿意自己嘅配搭，多謝屋企人畀咗我呢個身材！」
日前展鵬與詩詠於電視城為劇集《天命》拍攝一場感情戲，劇情交代自己親人被展鵬殺害的詩詠，與對方感情膠着，難捨難離，最終相擁承諾終身愛相隨。大熱天時，兩人一身厚古裝戲服談情，鏡頭外當然一點也不浪漫。談到《天》劇多個月以來的拍攝，展鵬不禁說：「呢套劇相信係我表現最唔在狀態嘅，因為之前啱啱拍完《同盟》又再開工，體力透支兼且呢套劇嘅對白比較冗長，之前又去過北京同橫店外景呢！」
長城外景最攞命
展鵬直言在內地拍外景期間，每日凌晨4時開工至晚上11時，加上動作場面傷及頸和腿部，至今未完全康復：「好記得喺長城外景，拍攝地方唔係一般嘅旅遊景點，好難行加上天氣變化，有工作人員唔舒服，後來仲證實患上肺炎，總之呢個旅程比想像中辛苦。（煞科後想放假？）其實我有8個月冇休息喇，打個比喻好似銀包咁，冇錢就要停一停、儲吓錢增值，不過（放長假）都需要同公司商量同配合。」
唐詩詠身材冇負擔
至於詩詠主演的《不懂撒嬌的女人》熱播引起關注，日前一場戲談及身材，她被指為「A Cup之城代表」，後來換上水着「升胸」，她大方笑說：「作為演員好多嘢會成為焦點，包括我哋嘅樣貌及身材，但當然希望可以用作品令大家鍾意自己啦。今次引起大家關注，證明我哋嘅劇本得到共鳴，我就絕對滿意自己成個人嘅配搭，係健康、正常、舒服嘅，亦都唔辛苦（暗指胸部負荷），多謝屋企人畀咗我呢個身材。」
文：影視組